Перейти до основного змісту
Remzi Bekirov ailesinen. Кримська солідарність

19 yılğa maküm etilgen Remzi Bekirov, altı sene içinde ilk sefer ömür arqadaşı ve üç balasınen uzun müddetli körüşüvge çıqtı. Körüşüv Hakasiya Cumhuriyetinde yerleşken 33-nci müstemelede olıp keçti. Ailesine yolculıqta jurnalist Rustem Bekirovniñ babası ozğara edi.

Qırım birdemligine onıñ apayı Halide Bekirova bunı bildirdi.

Siyasiy mabüsniñ ömür arqadaşı Halide Bekirovanıñ aytqanına köre, apis müddeti devamında Remzi 15 kilogramm kilo berdi.

"Vazgeçmege mecbur olğanı domuz etli aşlar ve kündüz yatmağa yasaq - episi bu Remziniñ sağlığına zarar ketire. Amma daa da ciddiy bir şey - müstemlekeniñ hadimleriniñ ruhiy basqısıdır. Onı daima maneviy ceetten bastırmağa tırışalar", — dep tarif etti Halide Bekirova.

Gece namaz qılmağanı, elbez üzerinde dua etkeni, müstemlekeniñ hadimlerinen selâmlaşmağanı ya da şapqa taqmağanı içün jurnalist yedi kere ceza izolâtorına (ŞİZO) yollanılğan edi. Şimdi Bekirov eki aydır sert tutuv şaraitinde buluna.

Remzi Bekirov aqqında ne bilemiz

Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.

2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.

25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.

2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.

2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.

Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.

Telegram, WhatsApp ve Facebookta Suspilne Qırım haberlerine abune oluñız

Топ дня
Вибір редакції