Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) 2-nci SİZOda qanunsız alda tutulğan Qırım siyasiy mabüsi Anatoliy Kobzarnıñ sağlıq vaziyeti fenalaşa. Menyer hastalığı sebebinden o, şiddetli baş aylanuvı, baş ağrısı, yürek bulanuvı ve muvazene ğayıp oluvı, ayrıca körme ve eşitme meselelerinden zarar köre. Uquq qorçalayıcılarnıñ malümatına köre, ada özü kamera ile areket etip olamay ve kerekli tedaviylevni almay. İşğalciler onıñ tevqif müddetini 2026 senesi ilk qış ayınıñ 17-ne qadar uzattılar.
Orta küz ayınıñ 13-nde Qırımtatar resurs merkeziniñ (QRM) saytında bu aqqında haber etildi.
«Qırımtatar Resurs Merkezi qanunsız sürette apiske alınğan Qırım siyasiy mabüsi Anatoliy Kobzarnıñ sağlıq vaziyeti fenalaşqanı aqqında haber aldı. O, şiddetli baş aylanuvı, baş ağrısı, yürek bulanuvı ve muvazene ğayıp oluvından azap çeke. Bundan ğayrı, körmesi ve eşitmesi fenalaşa, tizleri ve ayaqları ağıra, bu sebepten kamerada öz başına areket etip olamay», — dep qayd etildi haberde.
QRMniñ malümatına köre, baş aylanuvı Menyer hastalığı ile bağlı, 2026 senesi ilk yaz ayında QRM Anatoliy Kobzarnıñ diagnozını bildirdi.
«Onıñ alı koordinatsiya bozuluvı ve muvazene ğayıp oluvı ile kerginleşe. Bu sebepten merdivenlerni qullanmaq bile oña ağır kele, kamerada ise o, yalıñız zindandaşlarınıñ yardımı ile areket ete bile. Onıñ ayaqlarınıñ vaziyeti qasevetlendire. Olar, qaynağan suvnen pişirilgen kibi, qızıl renkli. Siyasiy mabüs kene de, hususan bükünende, tiz ağrılarından şikâyet ete. Yürgende tizlerde hususiy bir şıtır sesi eşitilir. Onıñ alı fenalaşqanınıñ diger alâmetleri arasında ayaqlarında saçlarnıñ bütünley yoq oluvıdır», — dep bildirdi uquq qorçalayıcılar.
Pek çoq şikâyetine baqmadan, oña ağrı kesici bermeyler ve kerekli tedaviylevni köstermeyler.
«Bundan da ğayrı, siyasiy mabüslerge kündüz ne oturmağa, ne de yatmağa ruhset berile, bu qaidege riayet etmegeni içün ise, fizikiy zorbalıq qullanıla», — dep bildirdi QRMniñ menbaları.
Bundan ğayrı, işğalli akimiyet Anatoliy Kobzarnı 2026 senesi ilk qış ayınıñ 17-ne qadar apiste tutacaq. Rusiye Devlet Dumasına qanunsız saylavlar vaqtında adamlarnı rey bermege mecbur ete ediler.
Daa evel QRM, Anatoliy Kobzar apiske alınğan soñ, sorğu ve işkence vaqtında elini qırıp, tişleriniñ bir qısmını çıqarğanlarını bildirdi.
«Rusiye esirliginde siyasiy mabüs ağırlığınıñ aman-aman yarısını berip ğayıp etti. Qayd etilgenine köre, Anatoliy Kobzarnıñ qanunsız apiske alınğanına qadar hronik hastalığı ve ciddiy sağlıq meseleleri yoq edi», — dep qayd etti QRM.
Hatırlatamız ki, 2024 senesi saban ayınıñ 5-nde işğal etilgen Qırımda Anatoliy Kobzarnı qanunsız tuttılar. Rusiye uquq qorçalayıcı organları onıñ bulunğan yeri aqqında malümatnı çoqtan gizley edi. Şimdi o, «devlet hainligi»nde uydurılğan qabaatlavlar boyunca Simferopolnıñ (Aqmescitniñ) 2-nci SİZOda tutula.
Qırımtatar Resurs Merkezi qayd ete ki, «azatlıqtan marum etilgen şahıslarğa kerekli tibbiy yardım kösterilmemesi halqara gumanitar uquqnıñ qaba bozuluvıdır ve insanlıqqa zıt yanaşuv olaraq tanıla bile».
Daa evel Suspilne Qırım Kоbzarnıñ qardaşı Nataliya Fluris ve Qırımtatar Resurs Merkeziniñ (QRM) yolbaşçısı Eskender Bariyevden onıñ ğayıp oluvınıñ tafsilâtlarını ögrendi. Bu aqqında maqalemizde oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız