İşğalciler Bağçasaray rayonından qırımtatarlarğa qarşı uydurılğan cinaiy davanı mahkemege bereler. O, Rostov-na-Donu şeerindeki Cenübiy bölge arbiy mahkemesinde baqılacaq.
Orta küz ayınıñ 1-nde işğalli Qırım prokurorlığı Rusiyeniñ yasaq etilgen «Vkontakte» içtimaiy ağında bunı bildirdi.
«Qırım prokurorlığı mahkemege terror teşkilâtınıñ faaliyetinde iştirak etüv aqqında cinaiy davanı yolladı. Taqiqatnıñ versiyasına köre, 2025 senesi qara qış ayından orta küz ayına qadar qabaatlanğanlardan biri Bağçasaray rayonında Rusiye Federatsiyasında faaliyetleri yasaq etilgen terroristik teşkilâtnıñ faaliyetini teşkil etti, digerleri bu teşkilâtnıñ azaları oldı. Konspiratsiya toplaşuvlarında qadınlar aşırıcı edebiyatnı ögrene ve devlet akimiyetini zapt etmek kerekligini muzakere ete ediler. (...) Cinaiy dava Cenübiy bölge arbiy mahkemesine yollanıldı», — dep qayd etildi haberde.
Hatırlatamız ki, 2025 senesi orta küz ayınıñ 15-nde Esma Nimetulayeva, Nasiba Saidova, Elviza Aliyeva ve Fevziye Osmanova qanunsız sürette tutuldı. Şimdi olar orta küz ayınıñ 14-ne qadar apiste bulunalar ve terroristik faaliyetnen bağlı sebepsiz qabaatlavlarnen qabaatlanalar. Bu, Qırımda qadınlarğa qarşı ilk «Hizb ut-Tahrir davası»dır.
«Bağçasaray qadın gruppası» davasınıñ tahqiqatı ilk küz ayınıñ 4-nde yekünlendi. Esma Nimetulayevanıñ aytqanına köre, Rusiye Ceza qanunnamesiniñ 205.5-nci maddesine binaen, qadınlar terroristik teşkilâtnıñ faaliyetinde iştirak etkenleri içün qabaatlana ediler (RF CQniñ 278-nci maddesinden 30-ncı maddesiniñ 1-ncı qısmı).
«Bu qabaatlav maddesi, Qırım sakinlerine qarşı açılğan "Hizb ut-Tahrir" davalarınıñ tipikidir. Dava mabüslerniñ soy-soplarınıñ aytqanlarına köre, dava mabüsleri tarafından tanılmağan gizli şaatlarnıñ malümatına esaslana», — deyler mabüslerniñ soyları.
Mahkemede imayeciniñ tarafı, cinaiy davanıñ bir sıra bozuluvlarına işaret etip, qadınlarnı terroristik faaliyetinde qabaatlav esassız olğanını ve yalıñız FSBniñ delillerine esaslanğanını qayd etti.
2025 senesi orta küz ayınıñ 15-nde qırımtatar qadınlarınıñ apiske alınması aqqında ne bilemiz
Orta küz ayınıñ 15-nde saba işğalciler Qırımda dört qırımtatar qadınını tuttılar.
Birinciden Bağçasarayda bir qaç balanıñ anası ve siyasiy mabüs Remzi Nimetulayevniñ apayı Esma Nimetulayeva tutuldı.
Aynı rayonnıñ Holmivka (Zalanköy) köyünde işğalciler bala bağçasında terbiyeci olıp çalışqan pedagogika kolleciniñ studenti Nasiba Saidovanıñ evini tinttiler. Dolınnede (Topçıköyde) quvetçiler Elviza Aliyevanıñ evine kirdiler, Orlivkada (Mamaşayda) ise Fevziye Osmanovanıñ evini tinttiler.
Tutulğanlarnıñ episi Simferopoldaki (Aqmescitteki) FSB idaresiniñ binasına ketirildi ve olarğa Rusiyede yasaq etilgen "Hizb ut-Tahrir" teşkilâtında iştirak etkenleri aqqında madde boyunca şübe bildirildi. Rusiyeniñ "RİA Novosti" devlet agentligi, işğalli FSBge atıf etip, tutulğan qadınlar "Qırım musulmanları arasında dünya halifeliginiñ ideologiyasını tarqatqanı" aqqında bildirdi.
Orta küz ayınıñ 16-nda Qırımnıñ işğalli Kıyiv rayon mahkemesi olarnı eki ayğa apiske aldı. Apiske alınğan qadınlarğa qarşı qorçalayıcı tedbirlerniñ saylanuvı boyunca bütün dört oturış qapalı şekilde keçirildi. Advokat Emil Kurbedinovnıñ aytqanına köre, bütün qadınlar işğal etilgen Simferopoldaki (Aqmescitteki) 1-nci SİZOda tutulacaq. Onıñ malümatına köre, Esma Nimetulayeva işğalciler tarafından Rusiye Ceza qanunnamesiniñ 205.5-nci maddesiniñ 1-inci qısmı (terror teşkilâtınıñ faaliyetini teşkil etüv) boyunca qabaatlana, diger apiske alınğan qadınlar ise aynı maddeniñ 2-nci qısmı (terror teşkilâtında iştirak etüv) boyunca qabaatlanalar.
Esma Nimetulayeva — beş balanıñ anası, 2023 senesi arman ayınıñ 23-nde işğalciler tarafından tutulğan ve Hizb ut-Tahrir davasınıñ beşinci Bağçasaray gruppasınıñ siyasiy mabüsi Remzi Nimetulayevniñ apayıdır.
Nasiba Saidova — pedagogika kolecinde oquğan, bala bağçasınıñ bebek gruppasında çalışqan qız, dep "Qırım birdemligi" bildirdi.
Fevziye Osmanova — tükân hadimi, onıñ evi Bağçasaray rayonınıñ Orlivka köyünde yerleşe.
Elviza Aliyeva Simferopoldaki (Aqmescitteki) fırında kasiyer olıp çalıştı, Qırım federal universitetiniñ dörtünci kursında "Menecment" ihtisasını ala.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız