Rusiye tarafından «Hizb ut-Tahrir» davasında 11 yılğa üküm etilgen Qırım siyasiy mabüsi Yaşar Şıhametovğa Kemerovo vilâyetindeki müstemlekede 3 dereceli saqatlıq berildi. Adam ve tuvğanlarınıñ aytqanına köre, onıñ sağlığı pek fenalaşa, em de buğum ve omurğası ile bağlı meseleleri sebebinden o, areket etip olamay.
Qırımdaki uquq qorçalayıcılarnıñ menbaları Suspilne Qırımğa bunı bildirdi.
Şıhametov bir qaç hastalıq aqqında tarif etti, olar onıñ areket qabiliyetini sıñırlay. Hususan, beş yıl devamında yürgende o, ayaqlarında qattı ağrı çeke. Adamnıñ aytqanına köre, Saratovadaki ekim ayaqlarınıñ buğumlarınıñ bozulğanını bildirdi, amma soñki diagnozı qoyulmağan edi.
Bundan da ğayrı, siyasiy mabüsniñ aytqanına köre, eki-üç yıl devamında onıñ tizleri sıq-sıq ağıra, bazıda şişe. O, tas kemigi ve omurğa ağırğanından şikâyet ete. Arqa meseleleri sebebinden o, saatte 10 metrge qadar barıp, qoltuq tayaq vastasınen areket ete bile.
2026 senesi arman ayında müstemleke ekimi Şıhametovğa osteohondroz diagnozını qoydı. Qırım siyasiy mabüsi yürek ağrıları, tiş ve körüv meseleleri, büyrek taşları ve qara cigerniñ büyükleşüvi aqqında da bildire.
Şıhametovnıñ malümatına köre, oña 3-nci dereceli gipertonik diagnozı qoyuldı, onıñ qan basımı 200 milimetrni teşkil ete bile. O şunı da qayd ete ki, soñki beş yıl devamında daima ilâclarnı qullana, lâkin olarnı ne içün qullanğanını añlatmadan bereler.
Onıñ saqatlığı tasdıqlanğan soñ, adamğa saqat arabasını bermek kerek ediler, amma, onıñ aytqanına köre, onı alâ daa almadı. Bu sebepten Şıhametov aşhanege ve ayaqyolğa öz başına barıp olamay, aşnı ise oña zindandaşları ketire.
«O, omurğa, qara ciger, büyrek ve bir sıra diger hastalığı bar olğanını ayttı. Bu vaqıt devamında [apiste olğanda] o, saqat oldı», — dep tarif etti siyasiy mabüsniñ adliyecisi.
Yaşar Şıhametov aqqında ne bilemiz
2021 senesi kiçik aynıñ 17-sinde Qırımdaki kütlevit tintüvlerden soñ işğalciler Yaşar Şıhametov ve daa beş qırımtatar adamını tuttılar.
2022 senesi berim ayınıñ 9-ında RF CQniñ 205.5. maddesiniñ 2. qısmına (RF qanunlarına köre terrorcı olaraq tanınğan teşkilâtnıñ faaliyetinde iştirak etüv) mücibi Şıhametov 11 senege maküm etildi. Tevqif müddetiniñ ibrinci dört senesini daa şiddetli şartlarnen apishanede keçirmeli.
Tevqif olunmadan evel aşçı olıp çalışqan qırımtatar adamınıñ ciddiy sağlıq meseleleri bar: hronik gipertoniya sebebinden qalp, mide, arqa ve qaara cigerler meseleleri bar. Yaramay sağlıq alı sebebinden makeme oturışları sıq sıq başqa tarihqa keçirildi. Üküm çıqarmadan evel adamğa acele yardım çağırğanlar.
2023 senesi ilk qış ayında Rusiyedeki Vlasıha şeeri Apellâtsiya makemesi, qart qırımtatar faalcisi Yaşar Şıhametovnıñ ükümini deñiştirmedi. Makeme oturışı vaqtında özüni yaramay duyğan ve aqrasınen ciddiy meseleler sebebinden qırımtatar adamını zaldan sediyede çıqardılar. Şimdi o, Saratov vilâyetiniñ Balaşiv şeeriniñ müstemlekesinde ceza çeke.
2024 senesi ilk küz ayında RF Yuqarı mahkemesi kassatsiya seviyesinde 11 senege mahküm etilgen qırımtatar faalcisi Yaşar Şıhametovnıñ ükümini deñiştirmeden qarar aldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız