İşğalciler Keriç şeeriniñ yarımadanıñ diger meskün yerlerinen demiryol alâqasını tikleyemediler. Qırımğa qanunsız Keriç köprüRusiye tarafından işğal etilgen Qırımnı Rusiye Federatsiyasınen bağlağan 19 kilometrlik Keriç keçitinde qanunsız qurulğan naqliyat keçitinden kelgen bütün Rusiye trenleri arman ayınıñ 31-ne qadar marşrutlarını Keriçte bitirecek. Bundan soñ, yolcularnı avtobuslarnen alıp keteler. Aynı şekilde yolcularnıñ Rusiyege ters yönelişte yolu da ola.
Arman ayınıñ 21-nde «Grand Servis Ekspress» Rusiye taşıyıcısı Telegramda bunı bildirdi.
«Arman ayınıñ 31-ne qadar dail Qırım yönelişindeki "Tavriya" trenleri Keriç-Pivdenna Novıy park stantsiyasından/stantsiyasına qadar areket etmege devam etecek. Trenlerniñ kelecek areket tertibi soñra beyan etilecek. Keriçnen Qırımdaki stantsiyalar arasında yolcularnıñ taşınması avtobuslarnen yapıla», — dep qayd etildi haberde.
Hatırlatamız ki, Rusiyeden kelgen ya da Qırım köprü vastasınen yarımadadan çıqmaq istegen yolcularnıñ Qırım boyunca demiryol taşımacılığı 2026 senesi ilk yaz ayınıñ 8-nde toqtatıldı, ilk yaz ayınıñ 23-nden başlap ise bugüngi künge qadar tamamınen lâğu etildi. O zaman işğalciler iddia ete ediler ki, dron Moskvadan kelgen trenge urulğan.
Bundan ğayrı, işğalciler, ilk yaz ayınıñ 3-nden başlap, Canköyden ketken trenlerniñ marşrutlarını deñiştirdiler, bu, demiryol stantsiyasında arbiy eşelon ve yolcu treni zarar körgen soñ oldı.
Yaz devamında Ukrayina Mudafaa Quvetleri Rusiye ordusınıñ qullanğanı Qırımdaki demiryol köpürlerine ve demiryol alâqası obyektlerine bir qaç kere zarar ketirdi:
- ilk yaz ayınıñ 4-ne keçer gecesi Qırımda Feodosiya (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonınıñ Vladıslavivka ve Rozdolne meskün yerinde işğalcilerniñ lokomotivleri ücüm etildi;
- ilk yaz ayınıñ 13-ne keçer gecesi Mudafaa Quvetleri Çongarda demiryol köprüsine zarar ketirdi;
- ilk yaz ayınıñ 18-nde ve 19-nda Ukrayina Mudafaa Quvetleri işğal etilgen Qırımda Rozdolne (Şimaliy Qırım kanalı üzerinde) ve Vladıslavivka rayonlarındaki demiryol köpürlerine ateşnen zarar ketirdi;
- ilk yaz ayınıñ 23-nde Ukrayina Mahsus Operatsiyalar quvetleri, Şimaliy Qırım kanalı üzerindeki demiryol köprüniñ tam yoq etilgenini bildirdi. Mahsus Operatsiyalar quvetleri añlattı ki, ilk yaz ayınıñ 22-ne keçer gecesi ukrayin dronları, işğal etilgen Rozdolnedeki Şimaliy Qırım kanalı üzerinden demiryol köprüni yoq etti — demiryol örtüsine zarar ketirildi ve onıñ bir açıqlığı bozuldı. Mahsus tamir etici demiryol tehnikası obyektke kelgen soñ, operatsiyanıñ ekinci basamağı başlandı. İlk yaz ayınıñ 23-ne qarşı gece MOQniñ dronları em tamir tehnikasına, em de köpürniñ qalıntılarına yañıdan zarar ketirdi;
- ilk yaz ayınıñ 28-ne keçer gecesi işğal etilgen Qırımda Mudafaa Quvetleri, işğalciler tarafından arbiy hızmetçilerni ve olarnıñ teminatını taşımaq içün qullanılğan İçki (Feodosiya rayonı) civarındaji demiryol köprüne zarar ketirdi;
- ilk yaz ayınıñ 30-nda ukrayin Baş Ştabı, Ukrayina Silâlı Quvetleriniñ Mudafaa Quvetleriniñ işğal etilgen Qırımdaki İçki yanındaki demiryol köprüne zarar ketirgenini bildirdi;
- oraq ayınıñ 3-ne keçer gecesi Ukrayina Mudafaa Quvetleri Krasnoğvardiyskıy kanalı üzerinden demiryol köprüne ücümler yaptı;
- oraq ayınıñ 7-nde Baş Ştab, Mudafaa Quvetleriniñ işğal etilgen Qırımda İçki ve Rozdolnedeki eki demiryol köprüne zarar ketirgenini bildirdi;
- oraq ayınıñ 13-nden 19-na qadar, UHHniñ malümatına köre, «Kavkaz» yük demiryol stantsiyasında tsisternalarnen demiryol anbarına zarar ketirildi;
- arman ayınıñ 1-ne keçer gecesi Ukrayina Mudafaa Quvetleri işğal etilgen Qırımda yarımadanıñ şarqındaki Vladıslavivka rayonındaki demiryol köprüne zarar ketirdi.
Hatırlatamız ki, bugün ukrayin arbiy hızmetçileri, işğal etilgen Qırımnı Rusiyeniñ Rostov-na-Donu şeerinen birleştirgen demiryolda yaqıtnen tsisterna ve teplovoznıñ ücüm etilgenini tasdıqladılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız