Vaqtınca işğal etilgen topraqlarda yaşağan ukrayinlerge, raqamlı havfsızlıq qaidelerine riayet etmege ve işğalden çıqmaq içün yardım muracaatlarından soñ mektüp ve telefon tarihını silmege tevsiye etile. Save Ukraine teşkilâtı, tolu miqyaslı istilâ başlağanından berli, ukrayinlerge, VİETdan, şu cümleden Qırımdan, havfsız marşrutnı planlaştırmaqtan başlap, mesken ve tasil yardımına qadar bütünley destek köstere.
Milliy muqavemet merkezi (MMM) Telegramda bu aqqında haber etti.
"VİETda olğanda, raqamlı havfsızlıqnı unutmañız. Yardım içün muracaat etken soñ, mektüp ve telefon tarihını siliñiz", — dep MMM hatırlata.
İşğal etilgen topraqlardan çıqmağa ukrayinlerge 12 yıldan berli çalışqan ve 5 yıldan berli bala ve gençlerni qurtaruvnen oğraşqan Save Ukraine teşkilâtı bedava yardım ete.
"Bu, havfsız marşrutnıñ azırlanuvından başlap, serbest Ukrayinada tasil ve mesken yardımına qadar destekniñ tolu deviri", — dep MMM añlata.
Sıcaq hat: 0 800 33 31 29
Telegram botu: @SaveUkraineOfficial
Poçta: info@saveukraineua.org
Ukrayinağa tolu miqyaslı Rusiye istilâsı başlağanından berli işğal etilgen yarımadanıñ Herson vilâyetinen memuriy sıñırı memleketniñ cenübinde arbiy areketler sebebinden çalışmay. Faqat işğal etilgen Qırım sakinleri Ukrayina kontrolindeki topraqlarğa çıqmağa tırışalar. Bunı nasıl yapmaq mümkün, Ukrayinağa qaytmaq içün şahsiy şeadetnameni nasıl resmiyleştirmek ve şahsiyetni belgilemek içün ukrayin vesiqaları olmasa, ne yapmaq kerek — Suspilne Qırım öz materialında tarif etti.
Hatırlatamız ki, qara qış ayınıñ 20-nden itibaren Rusiyede 14 yaşını toldurmağan balalarnıñ sıñırdan keçüvine dair yañı talaplar işke tüşürilecek. Bundan soñ Rusiye tış pasportı mecburiy olacaq. Yañı qaidelerni ruslar vaqtınca işğal etilgen topraqlarğa, hususan Qırımğa da tarqattılar.
Suspilne Qırımğa bergen izaatında Qırım uquq qorçalayıcı gruppasınıñ tedqiqatçısı İrına Sedova bu deñişmelerniñ işğal altındaki ukrayin balalarına nasıl tesir etecegini añlattı.
"Rusiye yañı sıñırdan keçüv qaidelerini vaqtınca işğal etilgen topraqlarnıñ, şu cümleden Qırımnıñ, sakinlerine işğal etilgen topraqlardan tış balalarnı alıp ketmege imkân bermemek maqsadınen kirsete. Yani, Rusiyeden ğayrı iç bir yerge ketmek mümkün degil. Rusiye böyle etip, insanlarnı balalarına vesiqalarnı, şu cümleden işğalli akimiyet tarafından berilgen pasportlarnı almağa mecbur ete. İşğal etilgen topraqlarnıñ sakinlerine nisbeten ayırım yapıla, çünki olar içün işğalden çıqmaq qıyın edi", — dep mütehassıs añlattı.
Aynı zamanda Ukrayina ükümeti vaqtınca işğal etilgen topraqlarda, hususan Qırımda yaşağan ve Ukrayina pasportı olmağan vatandaşlarnıñ yaşağan yerini tasdıqlav tertibini, kimligini belgilev ve şahsiyetini belgilev protsedurasını belgiledi. Şahsiyetni belgilev protsedurasına kelgende, hususan, balalıqtan işğalge oğrağan ve Ukrayina pasportını almağan büyükler içün — protsedura da deñişe. Onı online şekilde keçe bileler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız