Ukrayina prezidentiniñ Qırımdaki temsilcisi Olğa Kurışko Qırım ve diger vaqtınca işğal etilgen topraqlardan kelgen abituriyentler içün tasil imkânlarını qolaylaştırmağa devam etmege çağırdı.
O, ilk küz ayınıñ 20-nde ''ŞarqSOS'' HF tarafından teşkil etilgen, ''Tüşünceler festivali'' senelik platforması çerçivesinde keçirilgen "Yaşlar qaytacaqmı? Demografik buhran, balalar ve gençlerniñ kütleviy çıqışı" adlı konferentsiyada bunı bildirdi.
"İşğal etilgen topraqlardan kelgen gençler reintegratsiya siyasetiniñ bir qısmıdır. Bizim maqsadımız — bu balalar ve gençlerniñ Ukrayinağa qaytmaq imkânı olması ve Ukrayina olarnı beklegenini is etmelerini temin etmek", — dep Kurışko ayttı.
Onıñ aytqanına köre, Qırım ve diger vaqtınca işğal etilgen topraqlardan kelgen abituriyentler, Ukrayina nezaretindeki topraqlarda oquv yurtlarına kirmek içün qıyın ve maliyeviy ceetten ağır bir yolnı keçmege mecburlar.
Prezidentniñ Qırımdaki daimiy temsilcisi tasil aluvnı qolaylaştırmaq ve er basamaqta kerekli destekni temin etmek içün ceryannı devam ettirmek müimligini qayd etti.
Hatırlatamız ki, arman ayınıñ 27-nde on teşkilât Ukrayina Tasil ve ilim nazirligine muracaat etip, vaqtınca işğal etilgen topraqlardan kelgen abituriyentler içün kiriş şartlarını ğayrıdan baqmağa rica etti.
Al-azırda işğal etilgen topraqlardan, şu cümleden Qırımdan kelgen abituriyentlerniñ 2-nci imtiyazı 10%ni teşkil ete. Cemaat teşkilâtları, Tasil nazirligini, VİETdan balalar ve gençlerniñ aliy tasil almaq imkânlarını temin etmek içün yeterli miqdarda bücet yerlerini temin etmege çağırdılar.
Arman ayına qadar ukrayin aliy oquv yurtlarına vaqtınca işğal etilgen topraqlardan 4800 talebe qabul etildi. Bu raqam deñişe bile, çünki bu kategoriya içün kiriş kampaniyası orta küz ayınıñ 20-ne qadar devam etecek.
İlk küz ayınıñ 5-nde brifing vaqtında Ukrayina tasil nazirliginiñ aliy tasil ve büyükler tasil müdirliginiñ baş müdiri Oleğ Şarov bunı bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız