Rusiye ükümeti qarar aldı ki, satılğan bütün aletlerge Max Rusiye messenceriniñ endirilmesi mecburiy olacaq. Bu em telefonlarğa, em planşetlerge tesir etecek.
Telegramda RF ükümetiniñ matbuat hızmeti bunı bildirdi.
"İlk küz ayınıñ 1-nden bağ Max dijital platforması cep telefonına ve planşetlerge ög-özünden edirilmek kerek olğan programmalar cedveline kirsetilecek. O, 2023 senesinden berli bu cedvelde bulunğan VK Messenger yerine çıqacaq. Bundan da ğayrı, ilk küz ayınıñ 1-den başlap yerli RuStore uyğulama tükânı iOS ve HyperOS işletim sistemalarını qullanğan aletlerde qurulması içün mecburiy olacaq. Bugünde-bugün RuStore Android ve HarmonyOS işletim sistemalarınen çalışqan tehnikanıñ üzerinde endirile", — dep haberde qayd etildi.
Daa evel haber etkenimiz kibi, arman ayınıñ 13-nden başlap Rusiyede Telegram ve WhatsApp vastasınen telefon etmeler sıñırlandı. Qırımnıñ yerli sakinleri Suspilne Qırımğa bergen izaatlarında, telefon etmelerniñ blok etilüvini Max yañı Rusiye messencerinen bağladılar.
"Olar ise ilk küz ayından başlap öz Max programmasını zorbalıqnen endirmege mecbur etecekler. Bazı hastahanelerniñ, mekteplerniñ ana-babalar subetleriniñ zornen deñiştirilgenini bilem. Şunıñ içün, olarnıñ "Bizge şu duşman messencerleri nege kerek, bizim şuralar köregimiz bar?" dep aytacaqları — bu sadece vaqıt meselesidir", — dep yarımadanıñ sakini qayd etti.
"Sarı şerit" areketiniñ bildirgenine köre, işğalli Qırım tasil idaresiniñ "Max" Rusiye messencerini bütün Qırım studentleri içün mecburiy yapmağa tırışa.
"Tehnikiy malümatqa köre, ilâveniñ mikrofon, kamera, alâqalar, geolokatsiya ve şahsiy bilgilerge daima irişimi bar. O, standart vastalarnen söndürilmey, root-irişimnen faal surette qarşılıq köstere ve belli viruslarğa beñzegen şekilde sistem izinleri seviyesinde jar-bilgilerni qullana", — dep haberde qayd etilid.
"Sarı şerit"niñ malümatına köre, bütün malümat avtomatik olaraq VK ("VKontakte") platformasınen bağlı serverlerge berile. O, Rusiye mahsus hızmetleriniñ nezareti altında buluna ve Ukrayinada yasaq etilgen. Faalcilerniñ aytqanına köre, bu tek malümat toplama degil — bu "merkeziy dijital nezaret sistemasıdır".
İşğal etilgen Qırımda da maliye müessiseleriniñ hadimlerini Max Rusiye messencerine keçmege mecbur eteler. Bu hızmet Rusiye akimiyetiniñ tam nezareti altında, dep "Sarı Şerit" areketi bildirdi.
"Max — Rusiye messenceridir, Çinniñ WeChat qullanuvına köre qurulğan, qonuşuv, bank ve devlet hızmetlerini birleştire, amma Rusiye akimiyeti tarafından kontrol etile. "Ruslar, "çeburnet" olaraq adlandırılğan ağda tek bu şekilde bağ qurmağa isteyler", — dep haberde bildirildi.
Areketniñ iştirakçileriniñ bildirgenlerine köre, o, başta iş meseleleri boyunca, soñra ise bütünley, tek kommunikatsiya kanalına çevirilmek kerek. Bu em devlet qurulışlarına, em de ayrı şahsiy şirketlerge aittir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız