Çiçek ayınıñ 4-nde BMTniñ Tamır halqları meseleleri daimiy forumınıñ mütehassısı olaraq saylanğan Qırımtatar Süleyman Mamutov, New Yorktaki tedbirniñ 24-nci sessiyasınıñ açılışı vaqtında kene de Forumnıñ maruzacısı oldı.
Çiçek ayınıñ 21-nde Qırımtatar Milliy Meclisi Facebookta bu aqqında haber etti.
Mamutovnıñ aytqanına köre, maruzacı, Forumnıñ eki aftalıq işiniñ çıqışları ve körüşüvleriniñ neticeleri esasında Forumnıñ yıllıq esabatını azırlamalı. O, dünyanıñ er bir bölgesinde vaziyetni aydınlatmaq kerek.
"Maruzacınıñ öz bölgesinde tamır halqlarınıñ aqları vaziyeti aqqında malümatnı keniş cemiyetke bildirmek, Forumnıñ maruzasına ve diger vesiqalarına kirsetmek içün daa çoq imkânı bar. Evel, bizler Forumnıñ mütehassıs azaları arasında temsil etilmegence, Forumnıñ resmiy vesiqaları Ukrayina tamır halqlarınıñ aqlarınen vaziyetni aydınlatmay edi", — dep qayd etti o.
Aynı zamanda Meclis reisi Refat Çubarov, Süleymannıñ yañıdan saylanuvı onıñ "yüksek zenaat keyfiyetleriniñ tanınması ve dünyanıñ tamır halqlarınıñ vekilleri tarafından toprağı Rusiye duşmanları tarafından işğal etilgen Ukrayina ve tamır Qırımtatar halqına nisbeten belli bir ürmet kösterilmesi" olğanını qayd etti.
Mamutov öz işi aqqında daa evel Suspilne Qırımğa bergeni intervyuda tarif etti.
Birleşken Milletler Teşkilâtınıñ Tamır halqlar meseleleri daimiy forumı, bütün dünyada tamır halqları meselelerinen oğraşqan Birleşken Milletler Teşkilâtınıñ esas organıdır. O, er yıl toplaşıp, tamır halqlarınıñ meseleleri ve çağıruvlarını muzakere ete.
Forumnıñ maruzaları/esapları Birleşken Milletler Teşkilâtı ve onıñ aza devletleri içün tevsiyeler bere. Hususan, tamır halqlarınıñ siyasiy, medeniy ve diger kollektiv aqlarınıñ qorçalanmasına dair.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız