Kefede doğğan Yaroslav Hmelnıtskıy bala evinde ösken edi, mektep bitirgen soñ Sankt-Peterburgğa köçti. Keçken sene tapılğan biologik anası onı qorqutıp, adam Ukrainağa köçmege qarar berdi. Sumı vilâyetinen sıñırda FSBcılar onı bir qaç saat boyunca azapladılar ve qorquttılar. Bitaraf zonadan ölgen qadınnı alıp keçmege mecbur oldı.
Qırım sakini, bu qadınnıñ kim olğanını, FSB işçileriniñ azaplarını, anasınıñ qorqutqanını, feldşer olmaq hayalini ve Sankt-Peterburgdan Kıyivge nasıl kete bilgenini Suspilne Qırımğa añlattı.
Yaroslav Hmelnıtskıy babasını asla körmedi, üç yaşında anası Moskvağa çalışmağa ketip, onı Kefede qaldırdı. 25 yaşındaki adam, aile türlü bala evinde yaşap ösken edi. 9 sınıfqa qadar ukrain mektebinde oquğan edi, bundan soñ Sankt-Peterburgdaki universitetniñ mimarcılıq bölügine kirdi. O zaman Qırım işğal etildi.
Birazdan universitetni taşladı ve rus ordusında da müddetli hızmet etti. Amma tolu miqyaslı tecavuz başlağan soñ ne anası, ne de qız qardaşı onıñ Ukraina destek etkeninden memnün oldılar, aksine de qorqutmağa başladılar.
"Bir yerge ketme. Bizim ülkemizniñ ne qadar büyük organına baqçı", dep qandırmağa başladılar. Çoq saçma delil ketirdiler. Olarnı körmemezlikke urğan ve olarğa cevap bermegen soñ meni qorqutmağa başladılar. Yani eger sen ketmege tırışsañ, bunıñ olmaması içün er şey yaparmız, dep ayttılar... Qarar bermedim, qarar bermedim, ve böyle qorqutmalardan soñ qarar berdim. Mahsus qullanımlar vastasınen cen cep telefonım ve noutbukımnı "temizledim", — dep köçip kelgen adam añlattı.
Onıñ sözlerine köre, Telegramda göñülli gruppalarnı taptı, anda Rusiyeniñ Ukrainanen sıñırını nasıl keçmek mümkün olğanını añlattılar. Birinciden Sankt-Peterburgdan Belhorodğa kettim, o yerden ise Sumı vilâyetinen sıñırdaş olğan Kolotılivka kontrol-keçit noqtasına kettim.
"Belhorodda ilk kere bu patlamaları eşittim, cenk kördim, yahşıca duydım... Bu keçit noqtasına taksi aldım. Takside ketkende taksici meni qorquta edi, ukrain tarafında pek yaramay olğanını añlata edi", — dep Hmelnıtskıy qayd etti.
Faqat rus kontrol keçit noqtasında genç adam azaplar ve qorqutmalar çekip yaşadı, anda onı yedi saat tuta ediler.
"Bundan ğayrı, anda meni urdılar, şamarlar arasında qorqutmalar da bar edi. Meni çeçenlerge bereceklerini, nasıldır tola zavodına ketireceklerini ve anda meni kimse tapacağınını qorquta ediler. Közlerimni qapatacaqlarını, minna tarlasına yollaycaqlarını ve menim Ukraina tarafına ketecegimni aytıp qorquta ediler. Ketersiñ, ketmezsin, ketmeseñ, ketmezsiñ", — dep Qırım sakini tafsilâtlıca añlattı.
Keri qaytma, dep tenbilep, ruslar Yaroslavğa yol berdiler. Ukraina tarafında cenkleşken rus arbiy teşkilâtlarına qatılmamağa söz berip, video çıqardılar.
Amma ikâyesi mında bitmedi, çünki bir qaç daqqa içinde bitaraf zonada yürüyerek ketkende Qırım sakini, Moskvadan Ukrainadaki aqrabalarına ketken qadınnen rastkeldi. O özüni pey yaramay duya edi, zornen kete edi. Oña yardım etmek içün qadınnıñ elini aldı, amma bir qaç daqqa içinde qadın bayıldı.
"O zaman ölgenini ya da bayılğanını bilmeyim. Onıñ nabzını tapmağa tırıştım, amma ava pek suvuq edi. Ellerim buzladılar, iç bir şey duyamadım. Men tüşündim ki, ölip-ölmegenine baqmadan nasıldır onı alıp ketmek kerek... Onı özüne ketirmege tırıştım, amma yapamadım. Onıñ eki çantası bar edi. Bu çantalarını başınıñ tübünde qoyıp, Ukrainağa qoştım. Anda eşyalarımnı taşlar kettim, maña yardım etmelerini istedim. Sıñırcılar ayttılar ki, askerlerge bitaraf zonağa ketmek yasaq. Ağır eşyalarımnı taşlap kettim, keri qoşıp kettim", — dep Hmelnıtskıy hatırlay.
Yaroslav ölgen qaadınnı ukrain sıñırcılarına alıp ketti. Devlet sıñır hızmeti de bu ikâyeni isbatladı.
"Yazıq ki, qadınnı ayatqa qaytarmaq içün yapqanı areketlerniñ muvafaqiyeti yoq edi. Amma adam onı taşlar ketmedi ve onıñ bedenini ukrain keçdt noqtasına ketirdi. Anda ise sıñırcılar, qadınnıñ bedenini daa telükesiz yerge yollap, politsiya ve tıbbiyet hızmetine berdiler", — dep Ukraina devlet sıñır hızmetiniñ nutuqçısı Andriy Demçenko Suspilne Qırımğa bildirdi.
Köçip kelgen adamnıñ sözlerine köre, Ukrainağa ketkende feldşer olmaq içün oquycaq edi, amma bu ikâye istegini deñiştirdi. Bundan başqa, özüni ukrain duya.
"Men böylece kelecegimni körem: feldşer olmaq içün oqusam, insanlarğa yardım eterim. Ya da arbiy tibbiyetçi olmağa oqurım. Elbette, Ukrainada qalırım. Cenkniñ soñuna qadar mında qalacağım", — dep qayd etti o.
Şu anda adam, köçip kelgenler içün modul şeerçiginde yaşay. Qırım sakini, vasiy ana-babasınıñ sözlerine köre Harkivde yaşağan tuvğan qartbabasını tapmağa hayal ete. Bundan ğayrı, makeme oturışında iştirak etmeli, anda Yaroslav Hmelnıtskıynıñ olğanını isbatlamalı ve Ukraina vatadaşı pasportını almalı. Onıñ ukrain doğuv şeadetnamesi, ukrain attestatı ve bala evinden şeadetnamesi bar.
Telegram, Viber ve Facebookta Suspilne Qırım haberlerine abune oluñız
