Ailesi müstemlekede siyasiy mabüs Eldar Kantımırovnı ziyaret etti

Ailesi müstemlekede siyasiy mabüs Eldar Kantımırovnı ziyaret etti

Ексклюзивно
Ailesi müstemlekede siyasiy mabüs Eldar Kantımırovnı ziyaret etti
Фото: Суспільне Крим

Keçenlerde siyasiy mabüs Eldar Kantımırovnıñ apayı ve balaları müstemlekeden qaytıp keldiler, anda Eldar tevqif etilip otura. Babası ve aqayını körmek içün Rusiyeniñ Ulyanovsk vilâyetindeki Dimitrovgrad şeerine eki biñ kilometr aştılar.

Siyasiy mabüsniñ ailesi Suspilne Qırımğa bunı añlattı.

Eldarnıñ eñ büyük oğlu bildirdi ki, babasına yol üç kün sürdi.

"Dimitrovgradğa yaqınlaşqanda ava suvuqlaşıp tura edi. Ve stantsiyağa kelip anda pek suvuq edi. Men bellesem, ava -20 derece edi", — dep siyiyasiy mabüsniñ eñ büyük oğlu Yasın añlattı.

Elvina Kantımırova qayd etti ki, aqayı balalarını körip, deyerli beş senelik ayırılıq devrinde ne qadar çoq ösip yetkenlerinden şaşırıp qaldı.

"Biz quçaqlaştıq. Bundan soñ tortnen çay içtik. O bizge türlü tapmacalar, ikâyelerni añlattı. O pek deñişti. Sesi deñişti, o azdı, daa yüksek oldı. Onen körüşip pek sevindik", — dep siyasiy mabüsniñ büyük qızı Camilâ qayd etti.
Müstemlekede siyasiy mabüs Eldar Kantımırovnı ailesi ziyaret etti
Siyasiy mabüs Eldar Kantımırovnıñ büyük balaları. Фото: Суспільне Крим

Kreml esiriniñ apayı paylaştı ki, aqayı tevqif etilgen soñ balaları onıñ tayaması oldılar. Er kes pek yahşı oquy, riyaziyat ve fikiza olimpiadalarında ğalebe qazanalar. Büyük oğlu, hatıralıq satuvınen bağlı aile işini yapmağa yardım ete.

"O endi böyle "erkekçik" oldı. Eldarnıñ sözlerine köre, endi küçük erkekçik. Oğlunen erkekçe laf etti. Tevqif etilmeden evel Eldar balalarına çoq diqqat ayıra edi", — dep Elvina Kantımırova añlattı.
Müstemlekede siyasiy mabüs Eldar Kantımırovnı ailesi ziyaret etti
Elvina Kantımırova balalarınen. Фото: Суспільне Крим

Yasın yanına santıraç alıp, babasına ketti, çünki balalığından onı santıraç oynamağa ögrete edi.

"Babaşqağa ne ögrengenimni köstermege pek ister edim. Onen yarışmağa ister edim. Men aynı zamanda em bahtlı, em de kederli edim. Çünki men añlay edim ki, onı çoq vaqıt körmeycegim", — dep Yasın Kantımırov qayd etti.

Elvina müstemlekede adayını bir kere ziyaret etti. 2022 senesi ilk qış ayında onen ilk sefer körüşti. O vaqıt qadın, orta oğlu Sayfullanen ketti. Eñ küçük qızı 10 ay olğanda soñ kere babasını kördi. Tevqif etilgeni kün 2019 senesi bozarğan ayınıñ 10-unda olar Aluştadaki Eldarnıñ hasta babasında ediler. Saba saat 6da olarnıñ evine rus quvetçileri kirdiler.

"Men aqayımnı uyandırmağa başladım, o yuqulı edi, ve yuqlap: "Evini tintmegemi keldiler?", dep soradı", — dep Elvina hatırlay.
Müstemlekede siyasiy mabüs Eldar Kantımırovnı ailesi ziyaret etti
Balaları içün siyasiy mabüs Eldar Kantımırovnıñ resimleri. Фото: Суспільне Крим

Qadın aqayınıñ mektüplerini de kösterdi. Olarğa renkli defterlerden resimlerni yapıştırğan. Er bir balasına bir yer yaza. Bazıda öz kamerası ve yaşayışı aqqında resimlerni yollay. Amma kederli bir şey asla yazmadı.

"Olarnı oqumaq, ruhumıznı kötere. Ve biz onıñ sıcaqlığını, o vaqıt yanımızda olğanını duyamız", — dep Elvina añlattı.
Müstemlekede siyasiy mabüs Eldar Kantımırovnı ailesi ziyaret etti
Eldar Kantımırov. Фото: Суспільне Крим

Eldar Kantımırov Kıyiv islâm universitetinden mezun oldı, Mısırdaki Al-Azhar univeristetinde ameliyat yaptı. Balalarğa arap tili derslerini alıp bermege ister edi. Bundan ğayrı, boksnen ukrain çempionatlarınıñ mukâfatçısıdır, balalarnı idman ettirecek edi.

"Keçkende bizim babaşqamız boksnen oğraşa edi. O, boksta KMS edi. Tevqif etilmeden evel bizni idman ettire edi, türlü şeyler yapmağa ögrete edi", — dep siyasiy mabüsniñ büyük balası paylaştı.

Eldar Kantımırov tevqif etilgen soñ onıñ Parkinson hastalığını taptılar. O, babasından genetik şekilde keçti. Ailesi oña ilâç ve vitaminlerni yollamağa tırışa, amma senede 20 kg tek bir posılka ala bile. Apayınıñ sözlerine köre, şu anda advokatlar, siyasiy mabüsni Qırımğa daa yaqın apishanege etap etkenini añlaşmağa tırıştalar.

Eldar Kantımırov aqqında ne bilemiz

2017 senesi boş ayda OMON ve mahsus askerler Eldar Kantımırovnıñ evini ilk kere tinttiler. Bundan soñ bütün elektron cihazlarını alıp çıqardılar. İşğal quvetçileri ruhiy tesir eterek, onıñ evini çoq kere ziyaret ettiler. Qorquta ve Qırımdan ketmege ayra ediler.

Eldar Kantımırov cemaat faaliyetini yapmağa devam etti, tintüvler ve makeme oturışlarını faalca ziyaret ete edi, Aqnescit rayonınıñ Şumhay köyündeki "Salğır baba" musulman cemaatınıñ ayatında iştirak ete edi. Em Aluşta, em de Aqmescit rayonlarındaki bala bayramlarınıñ teşklilcisi edi.

2019 senesi bozarğan aynıñ 10-unda Kantımırov tutuldı, bundan evel dört qırımtatar adamınıñ evleri tintildi.

2021 senesi arman ayınıñ 16-sında RF Cenübiy bölge arbiy makemesi, Hizb ut-Tahrirniñ "Aluşta gruppası"nıñ iştirakçileri olğan Ruslan Nagayev, Eldar Kantımırov, Ruslan Mesutov ve Lenur Halilovğa üküm çıqardı. Adamlarnı "terror faaliyeti"nde qabaatlap, 13, 12 ve 18 senege maküm etti.

Telegram ve Facebookta Suspilne Qırım haberlerine abune oluñız

На початок