Apishane tibbiyetçileri Rustem Şeyhaliyevni baqqan soñ içtimaiy jurnalistni hastahanege yollamağa red ettiler. Bundan evel ükümine şikâyetnamesi baqılğanda makeme oturışında burnu qanmağa başladı.
Nevbetteki makeme oturışında qorçalayıcı Lilâ Gemecige siyasiy mabüs bu aqqında haber berdi, dep "Qırım birdemligi" yazdı.
Bildirildi ki, qara qış ayınıñ 16-sında o, Novoçerkasktaki 3. SİZOdan video alâqası vastasınen ükümine apellâtsiya arizasını baqmasına dair oturışta iştirak etecek edi. Faqat oturış vaqtında onıñ burnu pek qanmağa başladı. Onı tibbiy qısımğa yolladılar, amma bundan soñ kamerada keri qaytardılar.
"Rustem ayttı ki, tibbiy qısımnıñ işçileri, basım cedvelini kerekli ölçege ketirmediler ve böylece, alet doğru basım kösterdi", — dep esir etilgen adamnıñ sözlerine köre Gemeci añlattı.
Keçken oturışta Şeyhaliyevğa çağırılğan feldşer, burnundan qan aqıntısı vaqtında yüksek arteriya basımını qayd etti. Oña ilâç aşırını yaptı, amma hastahange ketirmege rede etti. Teşkerüv keçirmege ve kerkeli tedaviylev yazmağa imkân bermediler.
Keçenlerde Rustem Şeyhaliyev, apishane tibbiyetçilerini oña elektrikkardiogramma yapmağa rica etti — o, qalp kemligini çeke bile.
Hatırlatamız ki, keçken oturıştan soñ Lilâ Gemeci añlattı ki, oturıştan üç kün evel adamnıñ başı ağıra edi. O ağrı ilâçlarını içti, amma o yardım etmedi.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
Telegram ve Facebookta Suspilne Qırım haberlerine abune oluñız
