"Hizb ut-Tahrir" davasınıñ beşinci Bağçasaray gruppasınıñ iştirakçisi ve siyasiy mabüs Eldar Yakubovnıñ anasınıñ cenazesi işğal etilgen Qırımda tünevin ötkerildi.
Uquq qorçalayıcı Mümine Saliyeva Facebookta bu aqqında haber berdi.
Bundan evel belli oldı ki, Bağçasaray merkeziy rayon hastahanesiniñ reanimatsiya bölüginde 75 yaşındaki Menver Yakubova vefat etti.
Qayd etildi ki, tünevin qara qış ayınıñ 11-ide saat 15.00te Bağçasaray şeerinde Ğorkoğo sq., 28 adresinde cenaze ötkerildi.
"Menver, oğlunıñ körüşlerini ve yaşayış tarzını paylaştı ve halqnıñ inkişafına yardımcı olmaq, inançlarını ve degerlerini qorçalamaq içün köstergeni soñsuz ğayrette onı mümkün olğan er şekilde destek etti", — dep bildirildi.
Hatırlatamız ki, arman ayınıñ 24-ünde saba saat 4ten rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Telegram ve Facebookta Suspilne Qırım haberlerine abune oluñız
