Qırımdaki işğal Yuqarı makemesi, "Aluşta" diniy teşkilâtınıñ azası Zinur Appazovnıñ memuriy tevqifine appelâtsiya şikâyetnamesini baqtı ve deñiştirmedi. RF MBQniñ 20.3. maddesiniñ 1. qısmına ("Nefret ya da duşmanlıq yaratuv, insan itibarını aşalav") mücibi "Aluşta şeer makemesi" onı maküm etti.
Nazim Şeyhmambetov "Qırım birdemligi"ne bu aqqında haber berdi.
"Qorçalayıcı taraf şikâtetname yolladı, birinci seviyeli makemeniñ delilleri talil etildi ve araştırıldı. Bu bilgiler, appelâtsiya şikâyetnamelerinde qayd etildi. Bugün appelâtsiya makemesi şikâyetnamemizni qanaatlendirmedi, birinci seviyeli Aluşta şeer makemesiniñ ükümini ise deñiştirmedi. Men tüşünem ki, bu qarar qanunsız. O, sebeplerle qarşıdır", — dep advokat qayd etti.
Onıñ sözlerine köre, qorçalayıcı taraf, ciddiy ceryan bozmalarını qayd etti. Şu cümleden, mütehassıs tarafından degil ve çoq bozmanen keçirilgen araştıruv qarar, makemeniñ üküminiñ temeline qoyuldı. Bu araştırma haqlara qanunlar, talapar ve başqa qaidelerni bozdı.
Şeyhmambetov bildirdi ki, "makeme" körmemezlikke urdı ve qorçalayıcı tarafqa delillerniñ taqiqatını bermedi.
"Qanunnamege köre bu qararğa da şikâyetname yollaycaqmız, çünki, bağışlañız, amma o qadar "yaramay" bilgilerni men çoqtan körmedim. "Yaramay" bilgiler çoq, amma uquq ceetinden o qadar "yaramay" bilgiler az. Bu bilgiler, makemege yiberilmez edi. Amma yiberildi ve "Qırımdaki Yuqarı makeme"de tanındı. Appazovnıñ aytqanına köre, bu daa bir kere kösterdi ki, bu qarar qanunsızdır. Bu qararnıñ siyasiy sebebi bar. Bu memuriy tutmalar ve tqvqiflerden soñ olğan Aluştadaki vaqialar bunı tasdıqladı. Olarnıñ maqsadı, azası qorçalağanım insan olğan diniy cemaatnı yoq etmektir", — dep ayttı o.
Zinur Appazov aqqında ne bilemiz
İşğal etilgen Qırımnıñ Yuqarı Şuma köyünde saba saat 6:30ta rus quvetçileri, "Aluşta" mustaqil diniy musulman cemaatınıñ azalarınıñ evlerini tinttiler. Üç insannı tuttılar: Vilen Useinov, Zinır Appazov, "Aluşta" diniy cemaatınıñ ve "Yuqarı Cami"niñ imamı Yusuf Aşırov. Olarnı bir qaç künge tevqif ettiler.
İşğal Aluşta şeer makemesi, Ukrainada yasaqlanğan rus içtmaiy ağında "VKontakte"de 2016 senesi video yayınlağanı sebebinden din erbabı Zinur Appazovnı 5 künge tevqif ettiler. Videoda Rusiyede yasaqlanğan ve terrorcı bir teşkilât olaraq tanınğan "İçkeriya ve Dağıstan halqlarınıñ kongressi" teşkilâtınıñ timsali ve işareti olğan bayraq ögünde bir adam söz ayta.
Telegram, Viber ve Facebookta Suspilne Qırım haberlerine abune oluñız
