İşğal Aluşta şeer makemesi din erbapları olğan Yusuf Aşırov, Vilen Useinov ve Zinur Appazovnı 2, 10 ve 5 künge tevqif etti. Boş aynıñ 23-ünde saba maalindeki tintüvlerden soñ olarnı tuttılar.
UPD2: Makeme, RF MBQniñ 20.1. maddesine ("Cemaatqa itibarsızlıq kösterüvnen, içtimaiy yerlerde tsenzurasız sözlerniñ qullanılmasınen, vatandaşlarğa ıncıtuv ilişmelerinen, başqalarnıñ mülkini bozmanen ozğarğan içtimaiy nizam bozması") mücibi "Aluşta" diniy cemaatınıñ imamı Yusuf Aşırovğa eki künlik memuriy tevqifke maküm etti. "Politsiya" bildirdi ki, oña qarşı RF MBQniñ 5.26. maddesiniñ 4. qımsına ("Vicdan, din azatlığı ve diniy birleşmeler aqqında") mücibi protokol tizgende adam olarğa sögündi. Bu maddege mücibi Aşırovğa qarşı protokol tizmediler.
UPD: İşğal Aluşta şeer makemesi, Ukrainada yasaqlanğan rus içtmaiy ağında "VKontakte"de 2016 senesi video yayınlağanı sebebinden din erbabı Zinur Appazovnı 5 künge tevqif ettiler.
"Politsiya"nıñ esabatında qayd etilddi ki, onıñ saifesinde "Seniñ fiyatı eki kapik, Kadırovğa muracaat" adlı bir video taptılar. Videoda Rusiyede yasaqlanğan ve terrorcı bir teşkilât olaraq tanınğan "İçkeriya ve Dağıstan halqlarınıñ kongressi" teşkilâtınıñ timsali ve işareti olğan bayraq ögünde bir adam söz ayta.
Facebookta "Qırım birdemligi" bu aqqında haber berdi.
İşğal makemesi, Ukrainada yasaqlanğan "Vkontakte" rus içtimaiy ağında 2013 senesi post sebebinden Useinovnı tevqif etti. Anda beyaz bayraqta arap tilinde islâm imanı işareti qara boyanen yazılğan. Onıñ tercimesi böyle: "Allahtan başqa ilah yoqtır, Muhammed (s.a.v.) Allahnıñ Resûlüdir". RF MBQniñ 20.3. maddesiniñ 1. qısmında (Nefret ya da duşmanlıq yaratuv, insan itibarını aşalav) onı qabaatlaylar.
Boş aynıñ 23-ünde Qırımdaki tintüvler aqqında ne bilemiz
İşğal etilgen Qırımnıñ Yuqarı Şuma köyünde saba saat 6:30ta rus quvetçileri, "Aluşta" mustaqil diniy musulman cemaatınıñ azalarınıñ evlerini tinttiler. Üç insannı tuttılar: Vilen Useinov, Zinır Appazov, "Aluşta" diniy cemaatınıñ ve "Yuqarı Cami"niñ imamı Yusuf Aşırov.
Telegram, Viber ve Facebookta Suspilne Qırım haberlerine abune oluñız
