Qırımtatar Milliy Meclisiniñ başınıñ birinci muavini Nariman Celâl, "Adaletsizlik ikâyesi" mukâfatınıñ laureatı oldı.
Siyasiy mabüsniñ vekili olğan advokat Mıkola Polozov, Suspilne Qırımğa bu aqqında haber berdi.
Bildirildi ki, tünevin boş aynıñ 1-inde Praha şeerinde mukâfatlandıruv merasimi keçirildi. "Belâda insan" adlı eñ eski çeh uquq imayecisi teşkilâtlarından biri tarafından bu mukâfatnı teşkil etti. O er sene berilir. Keçken sene mukâfatnıñ laureatı, şimdi rus emirliğinde bulunğan ukrain uquq imayecisi Maksım Butkevıç oldı.
"Bu sene Nariman Celâl mukâfatlandırıldı. Onıñ ailesi Prahağa ketmegeni sebebinden olar maña, Nariman Celâlnıñ advokatı olaraq, mukâfatta bulunmağa avale ettiler. Merasim çerçivesinde Narimannıñ apayı Levizanıñ video muracaatı kösterildi", — dep Polozov añlattı.
Bundan ğayrı, mukâfatlandıruv vaqtında uquq imayecisi Narimannıñ apishanede yazğanı şiirini oqudı. Mukâfatını ise Qırımtatar Milliy Meclisine berecekler, çünki Nariman Meclisniñ başınıñ birinci muavinidir. Nariman qaytmağance mükafat anda olacaq.
"Nariman ise bir aydır etapta buluna, onı Qırımdan qanunsız olaraq ketirdiler. Bizim malümatımızğa köre, onı Subirge, Krasnoyarskiy krayğa tap etecekler. Yazıq ki, onen bağlanamamız", — dep Mıkola Polozov qayd etti.
Advokatnıñ sözlerine köre, şu anda Celâlnıñ ne yerde bulunğanı ve alı nasıl olğanı belli olmay. Bundna ğayrı, Aziz ve Asan Ahtemov aqqında iç bir şey belli olmay.
"Narimannı mukâfatlandıruv, siyasiy mabüslerniñ taqdirine diqqat celp ete. Men bellesem, bu pek müimdir. Ve biz ümüt etemiz ki, bu, serbest insanlarnıñ putin rejiminiñ ukrainalılarnı, qırımtatarlarnı ve işğal etilgen topraqlarda insanlarnı qanunsız olaraq taqip etmelerine boynunı egmege azır olmağanlarını tasdıqlay", — dep hulâsa çıqardı o.
Nariman Celâl ve Ahtemov ağaları aqqında ne bilemiz
- Nariman Celâl, 2016 senesi Rusiye tarafından "aşırıcılıq teşkilâtı" olaraq tanınğan Qırımtatar Milliy Meclisiniñ başınıñ muavinidir. Aziz ve Asan Ahtemov, qırımtatar faalcileridir.
- Anğara (Perevalnoye) köyündeki gaz borusını patlatmaqta şübege mücibi berim ayınıñ 3-ü ve 4-ünde Aqmescit ve Kezlev şeerlerinde beş qırımtatar adamı tutuldı – Eldar Odamanov, Aziz ve Asan Ahtemov, Şevket Useinov ve Qırımtatar Milliy Meclisiniñ başınıñ muavini.
- Berim ayınıñ 6-sında işğal "makeme"si, tutulğan qırımtatar adamlarını tevqif etti.
- 2022 senesi berim ayınıñ 21-inde böyle degen Qırım yuqarı makemesi, Qırımtatar Milliy Meclisiniñ başınıñ birinci muavini olğan Nariman Celâlğa, içtimaiy jurnalist olğan Asan Ahtemovğa ve eki domuş ağası Aziz Ahtemovğa üküm çıqardı.
- Celâl, şeddetli rejimli müstemlekege 17 senege maküm etildi, 700 biñ rublelik para cezası ve 1,6 senelik ketme sıñırması berildi.
- Asan Ahtemov 15 senege maküm etildi, 500 biñ rublelik para cezası ve 1 senelik ketme sıñırması berildi.
- Aziz Ahtemov 13 senege maküm etildi, 500 biñ rublelik para cezası ve 1 senelik ketme sıñırması berildi.
- 2023 senesi bozarğan ayda Qırımtatar Milliy Meclisiniñ başı Refat Çubarov bildirdi ki, Aqmescitteki 2. SİZOnıñ memuriyeti, Celâl ve Ahtemov ağalarına qarşı maneviy ve bedeniy şekilde azaplay.
- Ekim ayınıñ başında Nariman Celâl, Aziz ve Asan Ahtemov Rusiyedeki apishanelerge etap etilip, Qırımdan mecburen ketirildi.
Telegram, Viber ve Facebookta Suspilne Qırım haberlerine abune oluñız
