Mütehassıslar, Qırımtatar Milliy Meclisiniñ başınıñ birinci muavini Nariman Celâl, Asan ve Aziz Ahtemovnıñ makeme oturışını talil etmege bitirdiler ve cinaiy davanıñ makeme ceryanında adaletli makemenen bağlı 15 maddeniñ bozulmasını qayd ettiler.
"Qırım ceryanı" bu aqqında haber berdi.
Makemeniñ mustaqilligi ve peşin fikrini temin etüv, imaye aqqını yerine ketirüv meselelerinde eñ çoq bozma qayd etildi, dep uquq imayeciler bildirdiler.
Şu cümleden, birinci seviyede makemeniñ pişin fikirlerine Ukrainada üçten ekisi makemecine qarşı açılğan cinaiy dava ve üçünci makemeniñ sanktisya cedveline kirsetilmesi tesir ete bildi. Bundan ğayrı, ceryan vaqtında analitikacılar, makemeciniñ RF FSBniñ nazar noktasına ait olğanını tasdıqlağan eñ az 7 vaqia qayd ettiler. Olar, bu müesseseniñ işçilerini şahsiy sotaruv vaqtında körmek mümkün edi.
Bundan başqa, uquq imayecileriniñ esabatında bilridildi ki, işğal Qırım Yuqarı makemesinde makeme ceryanınıñ aşkârlığını qorumaq ıntıluvı qayd etildi, faqat bu davanen bağlı makeme oturışlarınıñ açılığı ve halq ögünde olmasını sıñırlağan eñ az 12 vaqia ve areket te qayd etildi.
Apellâtsiya müessisesinde davanıñ baqılması, aşkârlıq printsiplerine tamamınen qarşıdır, diñleyiciler ve jurnalistlerniñ kütleviy tutulmalarınen bite.
Bundan ğayrı, mütehassıslar taraflarnıñ teñlik standartlarını bozmalarnı qayd ettiler. Şu cümleden, makeme taqiqatı vaqtında birinci seviyeli müessisede taraflar, öz nazar noqtalarını tasdıqlamaq içün müim olğan 45 resmiy rica berdiler. Vaqialarnıñ 17%-inde devlet qabaatlatıcısı (berilgen 15 resmiy ricadan 3-ü), qorçalayıcı taraf ise vaqialarnıñ 85%-inde (berilgen 27 resmiy ricadan 23-ü) red malümatını aldılar.
"Aynı zamanda qayd etmek müim ki, qorçalayıcı taraf em delillerni berüv, em de qabaatlatıcınıñ delillerini talil etüv ceryanlarında eñ sıñırlanğan edi. Bozmalarnıñ bu parçasınıñ eñ yahşı misali, şaatlarnıñ gizlenmesi. aqqında soratuvlar oldı", — dep esabatta bildirildi.
Çoqusı allarda rus akimiyetiniñ kontrol etkeni matbuat kampaniyası neticesinde, qabaatlanğan insanlarnıñ masüm prezumptsiyası standartları da ciddiy trzda bozuldı, dep uquq imayecileri qayd ettiler.
Nariman Celâl ve Ahtemov ağaları aqqında ne bilemiz
- Nariman Celâl, 2016 senesi Rusiye tarafından "aşırıcılıq teşkilâtı" olaraq tanınğan Qırımtatar Milliy Meclisiniñ başınıñ muavinidir. Aziz ve Asan Ahtemov, qırımtatar faalcileridir.
- Anğara (Perevalnoye) köyündeki gaz borusını patlatmaqta şübege mücibi berim ayınıñ 3-ü ve 4-ünde Aqmescit ve Kezlev şeerlerinde beş qırımtatar adamı tutuldı – Eldar Odamanov, Aziz ve Asan Ahtemov, Şevket Useinov ve Qırımtatar Milliy Meclisiniñ başınıñ muavini.
- Berim ayınıñ 6-sında işğal "makeme"si, tutulğan qırımtatar adamlarını tevqif etti.
- 2022 senesi berim ayınıñ 21-inde böyle degen Qırım yuqarı makemesi, Qırımtatar Milliy Meclisiniñ başınıñ birinci muavini olğan Nariman Celâlğa, içtimaiy jurnalist olğan Asan Ahtemovğa ve eki domuş ağası Aziz Ahtemovğa üküm çıqardı.
- Celâl, şeddetli rejimli müstemlekege 17 senege maküm etildi, 700 biñ rublelik para cezası ve 1,6 senelik ketme sıñırması berildi.
- Asan Ahtemov 15 senege maküm etildi, 500 biñ rublelik para cezası ve 1 senelik ketme sıñırması berildi.
- Aziz Ahtemov 13 senege maküm etildi, 500 biñ rublelik para cezası ve 1 senelik ketme sıñırması berildi.
- 2023 senesi bozarğan ayda Qırımtatar Milliy Meclisiniñ başı Refat Çubarov bildirdi ki, Aqmescitteki 2. SİZOnıñ memuriyeti, Celâl ve Ahtemov ağalarına qarşı maneviy ve bedeniy şekilde azaplay.
Telegram, Viber ve Facebookta Suspilne Qırım haberlerine abune oluñız
