Vaqtınca işğal etilgen Qırımda qırımtatarlarğa qarşı “aile repressiyaları” çoqlaşa. Uquq imayecileriniñ bilgilerine köre eñ az 17 aileniñ eki-dört yaqınaqrabaları tevqif ve maküm etildi.
İçtimaiy jurnalist, uquq imayecisi Lütfiye Zudiyeva Suspilne Qırımğa bu aqqında haber berdi.
"Bazı ailelerde tevqifler, tintüvler devam ete. Quvetçiler, bazı ailelerge ekişer, üçer keteler. Bu ameliyat muntazam ola, ve şu anda eñ az 17 aileniñ eki - dört aqrabası, siyasiy mabüstir. Bu, tek ögrene bilgenimiz malümattır, çünki insanlar, halq ögünde bunı bildirmege ve bizge tevqifler ve öz ikâyelerini añlatmağa razı oldılar. Qırımda pek çoq repressiya gizli şekilde yapılır”, - dep añlattı o.
Uquq imayecisiniñ sözlerine köre, repressiyalar çoqlaşa, çünki tek alınıp apis etilgen insan degil, aqrabaları da ücüm astına oğraşalar.
Aynı zamanda şu anda eñ populâr madde, terrorcılıq faaliyetine ait oluv (RF CQniñ 205.5. maddesiniñ 2. qısmı), şu cümleden tamam Hizb ut-Tahrir islâm siyasiy fırqasına ait oluv. Oña mücibi Qırımda endi 106 insan maküm etildi.
Böylece orta küz ayınıñ 24-ünde Canköy rayonındaki Qalay qasabasında FSB ve “politsiya”, siyasiy mabüs Riza Omerovnıñ qaynatası Amet Bairovnıñ evini tinttiler. Onıñ sözlerine köre, işğalciler sanki patlayıcı aletni qıdırğan ediler. Adamğa advokatınen bağlanmağa izin bermediler. Quvetçiler, iç bir şey tapmayıp kettiler, iç bir vesiqa da bermediler.
“Garajğa kettiler, baqtılar, evime kirdiler, “Böyle oldı, ya siz siñirlediñiz”. Siñirlememek olmay, kiyevimni sebepsiz apis ettiler, oña qarşı iç bir şey yoq”, - dep Bairov “Qırım birdemligi”ne añlattı.
Adamnıñ kiyevi, “Hizb üt-Tahrir davası”nda Qarasuvbazar gruppasınıñ iştirakçisi Riza Omerov. 2019 senesi bozarğan ayda işğalciler onı tuttılar. Birazdan terrorcılıqta qabaatlap, 13 senege maküm ettiler. Umumen bu ailede üç siyasiy mabüs bar.
Ruslarnıñ repressiyalarına Bağçasaraylı Lilâ Seitumerovanıñ ailesi de oğradı. Onıñ qardaşı Rustem Seitmemetov ve üç oğlu - Seitumer, Osman ve Abdulmecit apis etildi. Arman ayınıñ 24-ünde işğalciler Abdulmecitni tuttılar, şimdi o SİZOda buluna. Başqalarını ise ruslar, sahte davalarğa mücibi terrorcılıqta qabaatlap, 13 ve 17 senege maküm ettiler.
Qırım uquq qorçalayıcı gruppasınıñ araştırıcısı İrına Sedova Suspilne Qırımğa haber berdi ki, buña aynı FSB taqiqatçısı - Dmıtro Hromaşov aittir.
"O, bu davalarnı tüşünip tize, Hizb ut-Tahrirde iştirak etmekte qabaatlanğan insanlarnıñ çoqusı qırım musulmanlarıdır. Tamam o bunen oğraşa ve bunı tüşünip tize, elbette pek yaramay gizlendi… Birinciden olar, aileniñ bir azasını tevqif ettiler, bundan soñ onıñ terrorcı olğanına esaslayaraq, aqrabalarını, qardaşlarını, babasını terrorcılar olaraq tanıycaqlar. Yani olar içün davalarnı tüşünip çıqarmaq daa qolay. Olar içün bu, daa az çalışmaq kerek demektir. Tamam bunıñ içün olar insanlarnı tevqif eteler”, - dep Sedova qayd etti.
O tadsilâtlıca añlattı ki, şu anda uquq imayecileri, başqa ülkelerniñ Rusiyege qarşı sanktsiyalarnı kirsetmeleri içün işğal etilgen Qırımda repressiyalarğa ait olğanlarğa dair bilgilerni toplaylar.
Telegram, Viber ve Facebookta Suspilne Qırım haberlerine abune oluñız
