2023 senesi berim ayında işğal etilgen Qırımda yarısı qırımtatarlarnıñ evlerinde olğan dört tintüv qayd etildi. Bundan ğayrı, aynı devirde sekiz insan tevqif etildi, olardan ekisi qırımtatar halqınıñ vekilleri.
Bu, Qırımtatar Maaliy Merkeziniñ (QMM) berim ayı içün esabatında bildirildi.
Tintüvler
Berim ayınıñ 13-ünde işğalciler, "milliy batalyonnıñ çalışqanı yerlerni silâlı qorçalavğa qatılğan ve Qırımnıñ "aşayt qurşavında iştirak etken" 54 yaşındaki Qırım sakininin evini tinttiler.
Berim ayınıñ 18-inde Kefe sakini Andriy Babuçenkonıñ evi tintildi. O, "Qırım köprüne ateş açmağa çağırğan ve Ukraina Silâlı Quvetlerini beklegen edi".
Berim ayınıñ 22-sinde rus quvetçileri, qırımtatar Amet Abdulganiyevniñ ukrain taraflı nazar noqtası sebebinden onıñ evini tinttiler.
Berim ayınıñ 27-sinde Sudaq yanında Qapsihor köyünde qırımtatar Celâl Cırınkovnıñ evi tintildi.
Tevqifler
2023 senesi berim ayında üç üküm, eki yañı tevqif ve eki memuriy tevqif qayd etildi.
Berim ayınıñ 20-sinde rusiye makemesi, ATR qırımtatar telekanalınıñ baş müdiriniñ muavini Ayder Mucadabayevnı uzaqtan 6 senege maküm etti.
Berim ayınıñ 28-inde işğal Qırım Yuqarı makemesi, "casuslıq" sebebinden ukrainalılar Mıkola Petrovskıy ve Serhiy Kotovğa 15 ve 16 senelik üküm çıqardı.
Berim ayınıñ 13-ünde Noman Çelebicihan adına batalyonda iştirak etken 54 yaşındaki Qırım sakini tevqif etildi.
Berim ayınıñ 27-sinde "devlet hainligi" sebebinden Qırımda Krasnodar sakini tevqif etildi. Bundan ğayrı, Qaça qasabasındaki farqlı astyapı obyektlerinde aerozol şişesi vastasınen ukrain timsalleriniñ resimleri yapqan Aqyar şeeriniñ sakini tevqif etildi.
Berim ayınıñ 21-sinde "RF SQni itibardan tüşürüv" sebebinden Yalta sakini 14 künge tevqif etildi.
QMMniñ bilgilerine köre, sekiz tevqiften biri – qırımtatar Leniye Umerovanıñ tevqifi müddetini uzatuvdır.
Tutuvlar
Berim ayında yedi insan tutuldı, olardan ekisi qırımtatarlar. Olarnen bağlı bilgiler ögrenilir.
Berim ayınıñ 8-inde "Qırımdaki demiryolda terrakt azırlağan" Aqyar sakini tutuldı.
Berim ayınıñ 13-ünde Noman Çelebicihan adına batalyonda iştirak etken 54 yaşındaki Qırım sakini tutuldı.
Berim ayınıñ 18-inde "Qırım köprüne ateş açmağa çağırğan ve Ukraina Silâlı Quvetlerini beklegen" Kefe sakini Andriy Babıçenko tutuldı.
Berim ayınıñ 26-sında eki qırımtatar Emil Nazarbekov ve Arsen Ceppar tutuldı.
Berim ayınıñ 27-sinde USQniñ tarafında cenkleşmek içün işğal etilgen Qırımda çıqmağa istegen Krasnodar sakini tutuldı.
Berim ayınıñ 28-inde "devlet hainligi" qabaatlanğan Aqyar sakini tutuldı.
Telegram, Viber ve Facebookta Suspilne Qırım haberlerine abune oluñız
