Qırımnıñ rus akimiyeti, işğal etilgen Qırımda yaşağan qırımtatarlarnı, vekâletli organları olğan Qurultay ve Meclisni destek seviyesini eksiltüv aqqında ifadelerini tarqatmağa devam ete.
Qırımtatar liderleriniñ bu aqqında be tüşüngenini Suspilnede oquñız.
"Millet" telekanalınıñ canlı yayınında söz aytqanda işğal Qırım ükümetiniñ içki siyaset, malümat ve alâqa naziniñ vazifesini vaqtınca yapqan Albert Qurşutov daa bir kere bildirdi ki, Qırımda Qırımtatar Milliy Meclisi öz tesirini coydı eken.
"Bugün Qırımda olarnıñ tesiri pek küçük ve olar bunı añlaylar. Olarnıñ yapqanları ve bildirgenleri er şey, agoniyağa beñzer. Er şey yapılğan soñ ve başqa çareleri olmağan vaqıt bir kimseniñ olarğa inanacağına ümüt eterek, sürrealistik vaqialar ve ikâyelerni tüşünip çıqarırlar", – dep Qurşutov bildirdi.
Rusiyeniñ Ukrainağa qarşı tolu miqyaslı cenki başlamadan evel, Qırımnıñ rus başı Serhiy Aksönov bildirdi ki, Meclisniñ özüni qırımtatarlarnen assotsiatsiya etme aqqı yoq. Rusiye FSB, Qırımtatar Milliy Meclisini "ukrain raşizminiñ esas tarqatıcısı" olaraq adlandırdı.
Qırımtatar Milliy Meclisiniñ başınıñ muavini İlmi Umerovnıñ fikrince, vekâletli organlar, öz halqına tesirini coyalmaz.
"Albert Qurşutov vekâletli organ ve içtimaiy teşkilât arasındaki farqını alâ daa bilmey ekenmi? Tamam bu tür laflar içün o, bu vazifege tayin etildi. Qaç qırımtararnıñ kimni destek etkenini, onıñ yapqanı faaliyet içün cinaiy ceza ala bilecegini pek yahşı añlay. Em de vatadaşlarnıñ sayğısızlığını qazanır. Men eminim ki, qırımtatar halqı, duşmannen işdeşlik yapqan er kesni destek etmez", – dep Meclisniñ basınıñ muavini vaziyetni tefsir etti.
"Qırım" qırımtatar batalyonınıñ komandanı İsa Akayev emindir ki, duşmannen işdeşlik yapqan insanlar "kerçekni istegenlerine çevirmege muvafaqiyetsiz tırışalar".
"Meraqlı bir ifade – kerçekni istegenlerine çevirmege muvafaqiyetsiz tırışalar. Tüşünem ki, kerçekten de vaziyet tamam aksinedir. Bizim halqımız, onıñ duşmanınıñ kim olğanını bilir. Şu anda USQ ordusında cenkleşken, cenkleşmege yardım etken insanlarnıñ nazar noqtası aynıdır. Bu, tezce evge qaytmaqtır. Doquz senedir Qırımnı esir etken bütün işğalciler ve olarnen işdeşlik yapqan er kesni topraqlarımızdan çıraqmaq. Bundan soñ Qırımnı yañıdan qurmaq, inkişaf etmek", – dep komandan bizden fikirlerinen paylaştı.
Qırımnı işğalden azat etüv ceryanını destek etken #LiberateCrimea halqara areket faalcisi olğan ve Ukraina Prezidentiniñ QMCdeki Vekilliginde iş tecribesine saip olğan Ruslan Seidametovnıñ sözlerine köre, "bu sözler arqasında sadece teşviqat ve belki, Qurşutovnıñ nazar noqtası saqlana".
"Amma şübelenem ki, aytqanına inana. Eger işğalciler bir şeyni tefsir etseler, demek ki bir şey olur. Eger teşviqat saasında bir şey tefsir etseler, demek ki, olar içün yaramay bir şey olur ve böylece olar, menfiy tesirni azlaştırmağa ve yoq etmege tırışırlar. İç bir şey sebepsiz olmaz, er şeyniñ sebebi ve neticesi bar. Eger işğalcilerniñ añlatqanları kibi Qırımda er şey yahşı olsa, ne içün siyasiy taqipler devam eter? Er vaqıt ücüm etilgen rus ordusınıñ ve obeyktleribiñ yerleşkenlerini ukrain istihbaratına kim añlatır? Umumen bu, baş laflar ve Qırım işğalden azat etilecek soñ bunı köre bilirler, ve eñ müim şey – er kes Meclis ve Qurultaynıñ destek seviyesini köre bilir", – dep faalci añlattı.
Qırımtatar faalcisi, sabıq siyasiy mabüs İsmail Ramazanov emindir ki, duşmannen işdeşlik yapqan insanlarnıñ bu tür ifadeleri, Qırımda ukrain taraflı qarşılıqnıñ küçüniñ artmasına reaktsiyadır.
"Bu tür ifadeler çoqlaşır. Albert Qurşutov, işğalcilerniñ oña qoyğanları vazifelerni yapar. O, baş teşviqatçı vazifesine tayin etildi, bunıñ içün o şübelememege tırışa ki, er ay onıñ şahsiy maliyeviy varlığı yahşılaşır. O, bizim halqımıznı işğal akimiyetine qarşılıq yapmamağa qandırmağa tırışır, aynı zamanda qırımtatar halqınıñ vekâletli organları olğa Meclisni aqaret eter. Amma duşmannen işdeşlik yapqan insanlarnıñ közü qaytmağa isteyim – işğal ebedi degil, er bir rejimniñ soñu bar, Qırım işğalden azat etilecek soñ, şu cümleden bizim halqımız ögünde, mesüliyet çekeceklerdir", – dep faalci, vaziyetniñ kelecegini añlattı.
Kefeden qırımtatar faalcisi Osman Osmanovnıñ sözlerine köre rus akimiyetine qatılğan qırımtatarlar, halqınıñ destegini coydılar.
"Olarnıñ da halqınıñ iç bir destegi yoq, amma öz vazifelerini aqlamaq içün bir şey aytmalılar", – dep faalci tefsir etti.
Rus akimiyeti ne qırımtatar halqınıñ riayetkâtlığını qazandı, bildirilir ki, işğal etilgen Qırım yarımadasında umumiy rusiyege qarşı nazar noqtalarınıñ sayısı arttı.
Telegram, Viber ve Facebookta Suspilne Qırım haberlerine abune oluñız
