İçtimaiy jurnalist, "Hizb ut-Tahrir davası"nıñ üçünci Bağçasaray gruppasınıñ iştirakçisi olğan ve qalp hastalığı çekken Amet Süleymanovğa üç ay devamında florografiya üç kere yaptılar, bunı red etmek mümkün degil edi.
"Deketor media" içün intervyuda apayı Lilâ Lümanova, bu aqqında haber berdi.
"Keçkende yazdı ki, oña taraflı rentgen de yapmağa isteyler. Ve er vaqıt onı mecbur eteler: flörografiyağa ketesiñ, episi bu. Saylav aqqı yoq. Olarğa bu, nege kerek? Belki, esabat bermek içün – berim ayınıñ 27-sinde oturış (sağlıq vaziyeti sebebinden cezadan azat etüvnen bağlı - müar.) planlaştırılır, bir şey yapqanlarını köstermeliler", – dep Lümanova qayd etti.
Qırımtatar siyasiy mabüsiniñ apayınıñ qayd etkenine köre bu, Qırımda işğalcilerniñ ceza sistemasında aqlarnı, şu cümleden sağlıq ve ayat aqlarını qorçalamaq imkânsızdır.
Amet Süleymanov aqqında ne bilemiz
- Süleymanov – 2014 senesi Rusiye Qırımnı qanunsız işğal etken soñ qırımtatarlarnıñ evlerini tintüvler ve olarnı tutuvlar aqqında haber bergen "Qırım birdemligi" içtimaiy jurnalistidir.
- O, qalpnıñ damar ve mitral kemligini çeke. Siyasiy mabüsniñ apayı Lilâ haber berdi ki, şu anda adam ameliyat nevbetinde tura. Bundan ğayrı, o qayd etti ki, onıñ içün hapishanede bulunmaq "ölüm kibi olacaq".
- Bundan ğayrı, qırımtatar adamı saqatlı edi, amma 2015 senesi Moskvada ameliyat almağa red etkeni içün o lağu etildi, çünki muntazam tedaviylengeni Kıyivde ameliyat almağa planlaştıra edi.
- Evi tintilgen ve 2020 senesi saban ayınıñ 11-inde tutulğan soñ 2023 senesi çiçek ayınıñ 5-ine qadar Süleymanov, ağır kalp hastalığı sebebinden ev tevqifi astında edi.
- Qorçalayıcı tarafnıñ Süleymanovnıñ sağlıq alına dair çoq arizalarına baqmadan Rostov-na-Donudaki Cenübiy bölge arbiy makemesi onı 12 senege şiddetli rejimli müstemlekege yollamağa qarar berdi.
- 2023 senesi arman ayınıñ soñunda Aqmescitteki SİZOdan "Vladimir merkezi" olaraq belli olğan Volodımırdaki 2. rus apishanesine etap etildi.
- Avropa Şurasınıñ Parlament Assambleyasınıñ (AŞPA) nutuqçıları, rus akimiyetini qanunsız olaraq epis etilgen Amet Süleymanovnı azat etmege çağırdılar.
Telegram, Viber ve Facebookta Suspilne Qırım haberlerine abune oluñız
