Oleksiy Reznikov yerine, Devlet mülkiyeti fondunıñ başı Rustem Umerov, mudafaa naziri ola bilir.
Etrafından eki menba Suspilnege bunı ayttı: "Oña teklif ettiler, ve o teklifini alacaq".
Kelecek afta Şura, şimdiki mudafa naziri Reznikovnıñ istifasını "yüksek imkânlıqnen" baqa bilir. Milliy telükesizlik eyyetiniñ eki azası bunı bildirdi.
Umerov aqqında ne bilemiz
2019 senesi "Holos" fırqası Yuqarı şurağa kirgende büyük siyaset saasına keldi. 2020 senesi Qırımnıñ işğalden azat etilmesi ve reintegratsiyasına dair parlament oturuşlarını başlattı.
Tolu miqyaslı tecavuznıñ başlnağıcından soñ Umerov, esir etilgen insanlarnı deñiştirüvnen bağlı aytışmalarda iştirak etti. Böylece onıñ yardımınen Azovstal mudafaacıları da qaytarıldı. Onıñ reberligi astında Devlet mülkiyeti fondu, obeyktlerni sataraq deyerli dört mlrd grivna aldı.
Reznikov mudafaa naziri nasıl oldı
2021 senesi berim ayında Rusiye ve Belarus, tahminen 200 biñ askerniñ iştirak etkeni "Zahid-2021" orta oquvlarını keçire ediler. 2021 senesi boş ayda general-leytenant Andriy Taran yerine uquqçı Oleksiy Reznikov, mudafaa naziri oldı. O zaman vazifeleriniñ esas planları arasında elektron satmalar vastasınen qabarcılıqnı yoq etüv ve NATOnen işdeşligini falleştirüv edi.
2022 senesi kiçik aynıñ 24-ünden soñ USQniñ ihtiyac duyğanları silâ ve maliye miqdarı pek arttı. Ukrainağa arbiy yardımnı tezleştirmek içün "Ramştayn" formatındaki körüşüvler teşkil etildi. Anda dünyanıñ çoq ülkesiniñ eñ az 40 mudafaa naziri iştirak ete. Bu körüşüvlerde Ukrainanıñ vekili Reznikovdır. Bu körüşüvlerniñ neticesi, şu cümleden tank ve uçaq birleşmesiniñ şekillenmesi oldı.
17 grivnalıq yımırtalar ve USQ içün tavuqlar
Reznikovnıñ kadentsiyasında bir qaç şamata oldı. Olardan biri — böyle degen "17 grivnalıq yımırtalar". O zaman "Dzerkalo tıjnâ", USQ içün aşayt mahsulatını satın almaq içün Mudafaa nazirliginiñ iştirakinen para hırsızlanır, dep bildirgen malümat yayınladı. Böylece, neşirniñ sözlerine köre, müessise yımırtalarnı 17 grivnağa satın alğan, amma o zaman tükânlarda tahminen 7 grivna edi. Neşirniñ bilgilerine köre, Mudafaa nazirliginiñ añlaşmasında eñ populâr aşayt mahsulatınıñ fiyatları 2-3 qat yüksektir.
O zaman bir qaç mebusqa şübe bildirildi. Qara qış ayında "Sluha narodu" fırqasınıñ başı Davıd Arahamiya bildirdi ki, Reznikovğa strategik sanayı saaları meseleleri naziri vazifesini berecekler, Mudafaa nazirliginiñ başı ise istihbarat başı Kırılo Budanov olacaq. Faqat endi ertesi künü Arahamiya bildirdi ki, Mudafaa nazirliginiñ reberligini deñiştirmeycekler.
Daa bir şamata, "Dzerkalo tıjnâ"nıñ araştırmasından soñ da peyda oldı. Neşir bildirdi ki, Mudafaa nazirligi qış urbası içün türk şirketinen añlaşma imzalağan. Jurnalistlerniñ bilgilerine köre, añlaşmanıñ fiyatı kurtkalarnıñ başlanğıç fiyatından üç qat yüksektir. Urba dış degil, yaz eken.
Reznikov matbuat konferentsiyasını topladı, anda o partiyadan kurtkalarnı kösterdi ve añlattı ki, olar yaz olmaya bilir, çünki "qış mevsiminde 140 000 asker bizde bunı aytar edi".
Bu araştırma yayınlanğan soñ "Ukrainska pravda" haber berdi ki, Zelenskıy Reznikovnı deñiştirmek içün insannı qıdıra.
***
LIGA.net'niñ malümatına köre, prezident Reznikovğa Büyük Britaniyadaki Ukraina elçisi vazifesini bermege baqa.
Suspilne tefsir almaq içün Reznikovnıñ matbuat kâtibine muracaat etti ve o cevap berdi ki, nazir "bunı endi tefsir etti".
Arman ayınıñ 28-inde Suspilne, prezidentniñ onen istifa aqqında laf etip etmegenini sorap, Reznikov başını menfiy tarzda salladı. Aynı zamanda ayttı ki, daa 2021 senesi nazir olmadan evel yapmağa istegeni "bir qaç leyha" prezidentnen muzakere etti: "Prezidentniñ masasında yapa bileceğim levhalar bar. Olar, Ukrainanıñ menfaatına, bizim mudafaa qabiliyetimizge yönelendir".
Zelenskıy oña Büyük Britaniyadaki Ukraina elçisi vazifesini teklif edip etmegeni mevzusında Reznikov doğrudan bir cevap bermedi.
