Qırımda Rusiye işğalcileri Ukrayin balalarına Ukrayinanı nefret etmege ögreteler. Bu "aşırıcılıqqa qarşı lektsiyalar" adı altında yapıla. Rusiye Federatsiyası Ukrayin tili, bayrağı ya da Ukrayina Silâlı quvetlerine qoltutqanını aşırıcılıq dep saya.
Milliy muqavemet merkeziniñ Telegram kanalında bu aqqında haber etildi.
"Rusiye Ukrayinanıñ VİETdaki mekteplerde yañı teşviqat dalğasını başlata. "Aşırıcılıqnen küreş" adı altında balalarğa er şey Ukrayin telükesi olğanını añlatalar", — dep aytıla haberde.
Şu da qayd etildi ki, bu lektsiyalarda Ukrayin tili, bayrağı ya da Ukrayina Silâlı quvetlerine qoltutuv — cezalanacaq "aşırıcılıq"tır. Bunı Rusiye FSBsi, polisi, Rusiye papazları ve Kremlniñ kontrol etkeni "faalciler" yapalar.
"QMM qayd etti: bu halqara uquqnıñ qaba bozuluvı ve Rusiye Federatsiyasınıñ daa bir cinayeti", — dep Milliy muqavemet merkezi qayd etti.
Hatırlatamız ki, Qırımda işğalli akimiyet yarımadağa kelgen balalar içün "test noqtaları"nı kirsetti. Milliy muqavemet merkeziniñ bildirgeni kibi, etnik Rus olmağan bütün balalar "sınavdan keçirile".
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
