Ruslar işğal etilgen Qırımğa qadar gaz borusınıñ quruv işlerini tezleştireler. Şimdi işğal etilgen Zaporijjâ vilâyetiniñ Berdânsk şeerinde işler alıp barıla.
Mariupol şeer yolbaşçısınıñ mesleatçısı, İşğal tedqiqleri merkeziniñ yolbaşçısı Petro Andrüşçenko "Hromadske radio"nıñ canlı yayınında bunı bildirdi.
"Qurucılıq nisbeten tez inkişaf ete. Keçken sene aytqan edik ki, olar Donetsk vilâyetinden keçip, Zaporijjâ vilâyetinde qurucılıqnı başladılar. Şimdi olar Berdânsknı keçtiler", — dep qayd etti o.
Andrüşçenkonıñ fikrince, bu sene işğalcilerni "bir şey toqtatmasa", Melitopolge qadar gaz borusını keçire bilirler. Gaz borusınıñ qurucılığı 2024 senesiniñ yazında başlandı.
Hatırlatamız ki, "Ateş" arbiy-partizan areketi, Qırımğa neft mahsulatınıñ ketirilmesine Mudafaa quvetleriniñ Rusiye Federatsiyasınıñ toprağındaki yermay zavodları ve neft bazalarına ücümleri, em de Keriç köprüne ücüm telükesi tesir etkenini bildirdi. Saban ayında "Ateş" agentleri işğal etilgen Qırım demiryollarında diversiya yapıp, yarımadadan Zaporijjâ vilâyetiniñ işğal etilgen qısmına yaqıt ketirilmesine keder etkenlerini bildirdiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
