Avropa insan aqları mahkemesi Rusiye ükümetine Ukrayina Helsinki insan aqları birliginiñ (UHİAB) bergeni arizanı bildirdi. Anda 2014 senesi yarımada işğal etilgen soñ Qırımdan sürgün etilgen on Ukrayin balası aqqında söz yürsetile.
Prezidentniñ Qırım Muhtar Cumhuriyetindeki temsilciligi bunı bildirdi.
İşğal vaqtında devletniñ nezareti altında olğan bala müessiselerinde bulunğan, bir yaşından beş yaşına qadar balalar aqqında söz yürsetile, dep anda qayd etildi. Qırımnı işğal etken soñ, Rusiye akimiyeti balalarnı Ukrayinağa qaytarmadı, bulunğan yerleri aqqında haber etmedi, soñra ise olarnıñ saifeleri Rusiye evlâtlıq saytında peyda oldı.
"UHİAB, balalarnıñ bir qısmı evlâtlıqqa alındı, dep tahmin ete, çünki olarnıñ malümatı platformada yoq oldı. 2014 senesi Rusiye akimiyeti ana-babasız qalğan 4 biñden çoq Qırımdan Ukrayin balasını öz vatandaşları olaraq ilân etti. Avropa insan aqları mahkemesine muracaat, hususan, Avropa insan aqları konventsiyasınıñ şahsiy ayat, serbestlik ve musaviylik aqqını qorçalağan maddelerine esaslana. Advokatlarnıñ aytqanlarına köre, vatandaşlıqnıñ öz başına deñiştirilmesi ve soñra evlâtlıqqa aluv balalarnı Ukrayina vatandaşları olaraq içtimaiy kimliklerinden marum etti. Qırım işğal etilgen soñ balalarnıñ müessiselerde tutulması da olarnıñ aqlarınıñ bozuluvı olaraq tanıla", — dep aytıla haberde.
Hatırlatamız ki, Qırımda işğalli akimiyet yarımadağa kelgen balalar içün "test noqtaları"nı açtı. Milliy muqavemet merkeziniñ bildirgeni kibi, etnik rus olmağan bütün balalar "test keçirile".
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
