Rusiyeliler Ukrainanıñ vaqtınca işğal etilgen territoriyalarından 1,7 million ukrain medeniy mirasını tış memleketlerniñ qara bazarında satmaq içün hırsızladılar. Aynı zamanda başqa memleketlernen işbirlik sayesinde hırsızlanğan eserlerni yavaş-yavaş qaytarıp olalar.
Bunı çiçek aynıñ 11-de "Ükrinform" agentligine bergen intervyüsında Ukraina medeniyet ve strategik kommunikatsiyalar naziri Mıkola Toçıtskıy bildirdi.
"İşğal etilgen topraqlarında medeniy mirasımıznıñ bir million yedi yüz biñ soyu hırsızlanğan: arheologik tapmacalardan başlap, Rusiye Federatsiyası halqara uquqnıñ bütün mümkün olğan normalarını bozıp, özüne menimsegen müzey kollektsiyalarına qadar. Ve eger qadimiy zamanlarda ruslar bizim adımıznı, tarihımıznı hırsızlağanda, Ermitaj ya da Moskva müzeylerine eksponatlar alıp barğan olsalar, şimdi olarnı qara bazarda muvafaqiyetli alış-veriş yapalar", – tarif etti o.
Öz nevbette em devlet başı, em de Toçitskiyniñ tış memleketlerge ziyaretleri vaqtında tış memleketlerniñ serbest organları olarnıñ yardımı ile Ukraina VİT-ında hırsızlap ve qara bazarğa satmaq içün tış memleketlerge alıp keçirilgen eserlerni bir qaç kere bergen ediler.
Medeniyet nazirliginiñ başı qoşqanı kibi, bu areketlerge Rusiye memurlarınıñ da alâqası bar. Böyleliknen, uvut ayında Ukraina ilk sefer Rusiye Federatsiyasınıñ medeniy, müzey ve diger erbaplarına qarşı sanktsiyalarnı kirsetken.
"55 şahıs ve üç uquqiy şahıs aqqında söz kete, biz olarnıñ ukrain medeniy mirasınıñ hırsızlavı, viran ve mahv etüvine iştirağını dos-doğru isbatladıq", — dep qayd etti o.
Bundan ğayrı, Ukraina Ujğorodta medeniy mirasınıñ imaye etüv meselelerini ve ilk nevbetteki ihtiyaclarını çezmek içün platformanı açqan. Poloniya öz nevbetinde Avropa Birliginde bu platformanıñ inkişaf etüv planını teklif etti.
"Ukrainağa yardım etüvi, ve bunıñ sayesinde, aynı vaqıtta Avropa memleketlerine arbiy çatışmalar vaqtında ateş astına oğray bilgen ya da yoq etilmek mümkün olğan medeniy mirasınıñ muvafaqiyetli imaye ya da evakuatsiya etilmesi içün nasıl qaide-nizamnameler olmaq kerek añlamağa yardım etilmesi aqqında da söz kete", — dep añlattı Toçıtskıy.
Hatırlatamız ki, Herson ressamlıq müzeyiniñ hadimleri 2022 senesi şeerden qaçıp ruslar tarafından hırsızlanğan 130-ncı resimini endi belgilediler.
Bundan evel mustaqil araştırmacı, müzey ve medeniy miras mütehassısı Katerina Çuyeva Rusiye, Ukrainanıñ medeniy mirasını muntazam sürette yoq eteyatqanını bildirdi. Ukraina tarafı içün müim vazifesi – Rusiye tecavuzı ile ketirilgen zararını qayd etip ve halqara seviyede adaletniñ tiklev yolları üzerinde beraberlikte çalışmasıdır.
Telegram, WhatsApp ve Facebookta Suspilne Qırım haberlerine abune oluñız
