Rostov-na-Donu şeerindeki Cenübiy bölge mahkemesinde, "Hizb ut-Tahrir davası"nıñ ekinci Canköy gruppasınıñ mabüslerine dair oturış devamında, prokuror altı qırımtatar musulmanına sert rejimli müstemlekede 17 yıllıq apis cezasını istedi.
Bunı siyasiy mabüslerniñ imayecileri bildirdiler, dep "Qırım birdemligi" haber berdi.
Devlet prokurorı 41 yaşındaki Osman Abdurazakov, 51 yaşındaki Leman Zekeryayev, 31 yaşındaki Ayder Asanov ve 39 yaşındaki Ekrem Kroş içün 17 yılğa qadar apis cezasını istedi. 69 yaşındaki Halil Mambetov ve 55 yaşındaki Refat Seydametovğa prokuror 17,5 yıl apis cezasını teklif etti.
Bundan da ğayrı, esas ceza müddeti bitecek soñ prokuror maküm etilgenler içün qoşma sıñırlavlar kirsetilmesini talap ete: saat 23:00-dan saat 6:00-ğace evden çıqmamaq, şeer bölgesinden tış çıqmamaq, yaşağan yerini deñiştirmemek ve ayda eki kere qorçalayıcı organlarda qayd olmaq mecburiyeti.
Oturış vaqtında Halil Mambetovnıñ advokatı qabaatlav aktında bir hata olğanı içün davanıñ prokurorğa qaytarılması aqqında muracaat etti — bir epizodda "Mambetov" soyadı yerine "Asanov" yazılğan edi.
"Makeme bu muracaatnı baqıp çıqsa da, böyle hatalar qabul etilmez, hususan bu vaqia içün (RF Ceza qanunnamesiniñ 278-inci maddesi) 8 yıl apis cezası berilgenini köz ögüne alsaq. Bu oyuncaq degil", — depadvokat Oleksey Melder qayd etti .
Nevbetteki makeme oturışı çiçek ayınıñ 15-ne belgilendi. Advokatlar ve mabüsler munaqaşalarına azırlanalar.
"Hizb ut-Tahir" davasınıñ ekinci Canköy gruppası aqqında ne bilemiz
Qara qış ayınıñ 24-ünde Canköy rayonınıñ köylerinde insanlarnıñ evleri tintilgen soñ altı qırımtatar adamı tutuldı ve Aqmescitke ketirildi. Anda ertesi künü olar tevqif etildi ve 1. SİZOda qapatıldı.
Arman ayında olarnıñ cinaiy davasınıñ bilgileri Rostov-na-Donudaki Cenübiy bölge arbiy makeemsine yollandı. Olar, Rusiyede yasaqlanğan ve dünyanıñ ülkeleriniñ çoqusında serbest şekilde faal etken "Hizb ut-Tahrir" islâm fırqasında iştirak etmege qabaatlanalar.
Berim ayınıñ 13-ünde belli oldı ki, "dava"nıñ iştirakçileri Aqmescitteki taqiqat izolâtorından Rostov-na-Donudaki 1. SİZOğa etap etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
