2024 senesi ilk küz ayından işğal etilgen Qırımda "medeniyet naziri" vazifesini eda etken Ukraina vatandaşı duşmannen işbirlik faaliyetiUkraina CQniñ 111-1nci maddesiniñ 5-nci qısmınde şübeli sayıldı. Onı 10 yılğa qadar apis cezası bekley.
Çiçek ayınıñ 7-nde Qırım Muhtar Cumhuriyeti ve Sevastopol (Aqyar) şeeriniñ prokurorlığı bu aqqında haber etti.
"İşğalli akimiyet organında teşkiliy-tertip vazifesini eda etip, "memur" Qırım yarımadasınıñ sakinleriniñ kimligini yoq etüv ve istilâcı devletniñ medeniy boşluğınen assimilâtsiya etüv Rusiye Federatsiyasınıñ siyasetini amelge keçire", — dep prokurorlıq qayd etti.
Ukraina havfsızlıq hızmetiniñ Qırım Muhtar Cumhuriyetindeki baş idaresi qayd etkenine köre, şübeli qadın Rusiye arbiy teşviqatınıñ Qırımnıñ sanat ve medeniy saalarına integratsiyası içün de mesüliyetli.
Hususan, bu sene onıñ reberligi altında RF Silâlı quvetleriniñ askerlerini qaramanlaştırğan sport ve eglence tedbirleriniñ teşviqat programması teşkil etildi. Bundan ğayrı, qadın muntazam sürette kütleviy tedbirlerde iştirak ete, olarnıñ maqsadı — Rusiye Federatsiyasınıñ Ukrainağa qarşı arbiy tecavuzınıñ teşviqatıdır. Taqiqatnıñ malümatına köre, 2014 senesi yarımada işğal etilgen soñ Qırımdaki Rusiye akimiyetiniñ qanunsız organlarında "çalışa".
Bundan da ğayrı, muhtariyet prokurorlığınıñ malümatına köre, qadın Avropa Birligi memleketleri, İsviçre, Yaponiya ve Kanadanıñ sanktsiyaları altında buluna.
Açıq menbalardan alınğan malümatqa köre, söz Tetâna Manejına aqqında kete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
