14 yılğa qanunsız sürette makeme etilgen qırımtatar uquq qoruyıcı Server Mustafayev, 2025 senesi saban ayı içinde Tambovdaki 1-ci müstemlekesiniñ cezahenesinde üç kün keçirgen. Cezahaneden soñ onı kameralı odasına alıp keçirdiler, anda o eki ay bulunğan edi.
Bunıñ aqqında Facebook-ta onıñ ömür arqadaşı Mayye Mustafayeva haber etti.
Onıñ sözlerine köre, saban aynıñ ekinci yarısında müstemlekege Moskvadan teşkerüv kelgen. Komissiya azalarından biri, qırımtatarlarına yenfiy munasebetini bildirgen.
"Server, çoqusını aytmağan, amma añlağanımız kibi, bu hadim, musulmanlarğa peşin fikirli munasebetinde olıp, aqiqatqa uymağan ifadelelernen olarğa öz duşmanlığını açıq köstere edi", – yazdı o.
Qadın, bu davada adaletke irişecegini ve uquq qoruyıcılar ve jurnalistlerden yardımını istegeni aqqında tarif ete.
"Vaziyetni daa teren tedqiq etip adaletke irişecegimiz. Apiste aqayımnıñ aqlarınıñ bozuluvınıñ yayınlandıruvına ve onıñ imaye etilmesi ve iman ve adalet mabuslarınıñ yanında tez vaqıtta azat etilmesi içün uquq qoruyıcılar ve jurnalistlerni, daa Ombudsmen ofisini, devlet ve cemaat institutsiyalarını qatnamağa rica etem", – yaza Mayye Mustafayeva.
Hatırlatayıq ki, uvut ayında Server Mustafayev sağlıq meseleleri ve Tambovnıñ 1-nci müstemlekesinde kerekli tibbiy yardımnı almağanını bildirdi. Onıñ bel ağrısı ve psoriaz alâmetleri peyda oldı, amma teşkerüvler endi eki ayğa qaldırıldı.
Server Mustafayev aqqında ne bilemiz
Server Mustafayev, "Qırım birdemligi" cemaat birleşmesiniñ idarecisidir. Qırım siyasiy mabüsleriniñ ailelerine uquqiy, malümat ve içtimaiy-yaşayış ceetinden yardım ete.
2014 senesinden başlap Mustafayev, Qırımdaki vaziyetni muntazam tarzda nezaret ete be siyasiy sebepli makeme ceryanlarını aydınlata edi.
2018 senesi mayıs ayınıñ 21-inde quvetçiler evlerini tintip, Server Mustafayev ve Edem Smayilovnı tuttılar.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde qırım musulmanını 14 senege maküm ettiler.
Saban ayınıñ 14-ünde Vlasisadaki Apellâtsiya arbiy makemesi, qorçalayıcı tarafnıñ şikâyetnamesini baqıp, qanaatlendirmedi. Umumen dava çerçivesinde 45 makeme oturışı keçirildi.
Telegram, WhatsApp ve Facebookta Suspilne Qırım haberlerine abune oluñız
