Qırımda Rusiye işğalcileri, vertolötlarnı taşımaq imkânı olğan "İvan Moskalenko" ve "İvan Rogov" adlı eki deñiz gemisini quralar. 2019-2020 seneleri Keriçte "Zalıv" zavodında qurucılıq başlandı. Qurucılıq ne qadar devam etecek daa belli degil.
Suspilne Qırımğa Ukraina Silâlı quvetleriniñ Arbiy deñiz quvetleriniñ nutuqçısı Dmıtro Pletentçuk bunı tarif etti.
"Şimdilik qurucılıq, soñki neticege qadar bayağı vaqıt qalğan bir basamaqtadır. Belki de, olar vaziyetniñ deñişmesini bekleyler. Şunıñ içün qurucılıq devam ete. Añlamaq kerek ki, olar qanunsız şekilde Ukrainanıñ Qırımnen beraber hırsızlağan "Zalıv" zavodı bayağı zemaneviy zavod edi ve zamanında ruslar bu müessiseniñ donatuv seviyesine şaştılar", — dep Dmıtro Pletçençuk ayttı.
Defence Express arbiy-deñiz mütehassısı, sabıq birinci derece kapitan Volodımır Zablotskıynıñ aytqanına köre, qurucılıqqa Kreml yolbaşçısı Vladimir Putin keldi.
"Bu, 2014 senesi Rusiye sipariş etken, para bergen ve beklegen aynı sınıf eki "Mistral" gemisiniñ Frenkistan tarafından zapt etilmesiniñ intiqamı edi. Bundan soñ olar: "Ebet, öz leyhamıznı qurmaq kerekmiz", — dep qarar berdiler. "İvan Moskalenko" ve "İvan Rogov" gemilerini azırladılar ve qurmağa başladılar. Olar quru köyde qurula", — dep Volodımır Zablotskıy qayd etti.
O şunı da qoştı ki, "Zalıv" zavodında daa evel arbiy gemiler qurulmadı. Amma Ukrainada biri-birine oşağan eki zavod bar — bu Mıkolayivda "Zalıv" ve "Okean" zavodları.
"Olar tamamınen aynı, bir leyha boyunca ve Şuralar Birligi zamanında Gemi qurucılığı nazirligine, hususan, arbiy gemilerni qurmağan, vatandaş gemi qurucılığınen oğraşqan bölükke ait ediler. Amma liman böyle gemilerni yapmağa imkân bere. Rusiyede bunıñ kibi bir şey yoq. Amma olar bunı qanunsız qullanalar. İşbu işğal etilgen obyektlerni resmiy olaraq idare etken şirketler sanktsiyalarğa oğratıla. Ne vaqıt qurulacağı ve qurulacağı belli degil. Anda, añlaşılğanına köre, raketalarımızğa oğrağan gemiler quruldı, olardan biri "Tsıklon" edi", — dep Volodımır Zablotskıy qayd etti.
Hatırlatamız ki, Rusiye işğalcileri yarımadada Rusiye akimiyetiniñ mevamını pekitmek içün Qırımda mektep, hastahaneler ve avtoyollarnı quralar. Aynı zamanda Rusiye ordusınıñ yañı yolları arbiy vazifeler içün kerek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
