Saban aynıñ 31 Ukraina musulmanları ayrıca qırımtatarları da aziz Ramazan ayını bitirgen Oraza bayramını (İd al-Fitr) qayd eteler. Bu kün olar barışıq, birdemlik ve Qırımnıñ qaytaruvı içün acet isteyler.
Qırımatar halqnıñ yetekçileri ve ukrain memurları imanlılarnı bayramnen hayırlap onı tuvğan evinden uzaqta qayd etkenlerine destek sözlerini bildirdiler.
Amma işğal etilgen Qırımda bu bayram kene de qıyın şaraitlerde keçe. Bunıñ aqqında öz muracaatında qırımtatar halqnıñ Meclisiniñ vekili Refat Çubarov qayd etken.
"Ukraina musulmanları on ekinci yıldır Ramazan ayına riayet etip 2014 senesi uvut ayında rusiyenen Qırımnıñ işğali ile başlanğan rusiye-ukrain cenkniñ şaraitlerinde Oraza bayramını qayd eteler. Alla Taalâğa Ukrainanıñ ğalebesi, siyasiy mabuslarnıñ serbest etüvi ve Qırımnı ukrain bayrağı astına qaytaruvı aqqında dua etemiz", – yazdı Çubarov.
Ukraina Mudafaa naziri Rustem Ümerov, cenkâver mevamlarında qalıp Oraza-Bayramını qayd etken musulmanlarnıñ quveti ve azimkârlığını qayd etken.
"Bugün Mudafaa quvetleri sırasında Ukrainanı imaye etken musulmanlarnı qayd etmege isteyim. Büyük orazası vaqtında siz cenkâver mevamlarında qalasız. Dua vaqtında ateş astında bile tınçlıqnı ve itibarnı saqlap tutqan ediñiz. Tek öz toprağı oğrunda degil, adalet, azatlıq, öz qıymetlerine köre yaşamağa aqqı oğrunda mudafaa etesiz", – qayd etti Ümerov.
Qırımtatarlarnıñ yetekçisi Mustafa Cemilev de dindeşlerine işanç ve qol tutuv sözlerinen muracaat etken.
"Aziz vatandaşlar, musulman taqviminde büyük bayram – Oraza bayramıdır (İd al-Fitr). Ukrainadaki bütün musulmanlarnı bayramnen hayırlap dualarımız eşitilecek dep ümüdim bar. Alla, işlerimizden razı olsun", – qayd etti Cemilev.
Qırımtatar resurs merkeziniñ başı Eskender Bariyev, tınç kökni ve tez vaqıtta ğalebeni tilegen.
"Alla Taalâ, siyasiy mabuslarğa tez vaqıtta serbest olıp öz ailelerinen qavuşmağa yardım etsin. Rabbimiz, bellisiz ğayip olğanlarına ailelerine qaytmağa yardımcı olsun. Alla, Qırımnı mecburiy tarzda terk etken er kesge qaytmağa yardım etsin", – qayd etti Bariyev.
QMC-de Ukraina Prezidentiniñ vekili Olğa Kurışko, basqılar yüzüniñ ögünde qırımtatarlarnıñ azimkârlığını qayd etken.
"Qırımda vatandaşlarımıznıñ tirenüvi, gizli areketler, apisten mektüpler, işğalcilerniñ cinayetleri aqqında dünyanı haberdar etken faallerniñ seslerinde olıp devam etmekte. Ve buna baqmadan, Qırımğa da ümüt, qaranlıq üzerinde yarıqnıñ ğalebe, ıntıluvlarnen beraber kelgen qolaylıq bayramı – Oraza bayramı kelgen", – yazdı Kurışko.
Türkiyede Ukraina elçisi Nariman Celâl, musulmanlarğa birdemlikke çağıruvınen muracaat etken.
"Bugün halqımız qıyın zamanlarını yaşamaqtadır: qısmıñız işğal astında yaşamağa mecbur, başqası – elinde silâ ile Ukrainanı mudafaa ete. Amma qırımtatar halqnıñ ruhı, adalet ve serbsetlikke işançı kibi boysunmağan. Bu muqaddes künü tınçlıq, ümüt ve aqiqat oğrunda küreşken er kesge ğalebeni ketirsin", – qayd etti Celâl.
Evelden QMC MRİ başı, Qırım Yuqarı müftiyi Ayder Rustemov ve Qırımtatar resurs merkeziniñ meneceri Zarema Bariyeva, Suspilne Qırımğa Oraza Bayramında ukrain musulmanları, ayrıca qırımtatarlarnıñ adetleri ve onı cenk şaraitlerinde nasıl qayd etkenleri aqqında tarif ettiler.
Telegram, WhatsApp ve Facebookta Suspilne Qırım haberlerine abune oluñız
