"Serbest Qırımğa mektüpler" teşebbüsi çerçivelerinde aktör Ğrığoriy Baklanov, rusiye makemesinen qattı nizamlı müstemlekesiniñ 13 yılına makeme etilgen qırım tatarı Yaşar Muyedinovnıñ mektübini oquğan.
Bunıñ aqqında QMC-de prezident temsilciligi bildire.
Yaşar Muyedinov şimdi RF-nıñ Ülyanovsk vilâyetindeki Dimitrovğrad şeerindeki icariy müstemlekesinde tutula. Uquq qoruyıcılarnıñ beyanatlarına köre, çeşit sürekli hastalavlar ayrıca gipertoniya, ayaqlarnıñ şişikligi ve arqa ağrısınen çekişe. Onıñ sağlıq alı, ep fena tutuv şaraitleri ve kerek olğan tibbiy yardımınıñ yoq oluvı sebebinden ep kerginleşe.
"Serbest Qırımğa mektüpler" teşebbüsine qoşulıñız: mektüpni yazıp tedbir aqqında dostlar ve işdeşlerine tarif etiñiz, içtimaiy ağlarda malümatnen paylaşıñız. Bu adiy adımlar vatandaşlarımızğa bütün manialarına baqmadan biz olarnıñ serbestligi oğrunda küreşmege devam etkenimizni duymağa yardım eterler", – qayd ettiler temsilcilikte.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Telegram, WhatsApp ve Facebookta Suspilne Qırım haberlerine abune oluñız
