Ukrainada saban ayınıñ 27-nde ilk sefer As-Salam arbiy camisi açıldı. Bu, mudafaa nazirliginiñ Baş İstihbarat idaresiniñ teşebbüsinen yapıldı, onıñ erkânında bir çoq musulman askeri bar.
Bİİ Facebook saifesinde bunı bildirdi.
"Bu yerde musulmanlar içün cuma namazları ve toplaşuvlar planlaştırıla, mında olar Quran oqumağa ögrene ve maneviy inançlarını arttıra bileler", — dep imam Süleyman Hayrullayev tarif etti.
Camide dua içün kerekli er şey bar, şu cümleden arap ve ukrain tillerinde Quran.
"Barışıq ve telükesizlik" halqara munasebetler merkeziniñ yolbaşçısı Husameddin Al-Halavani, musulmanlar içün camiler, "asker içün pek müim olğan" ruh küçüni toplağan yer ola, dep bildirdi.
"Bu caminiñ açılışı — bütün Ukraina içün pek müim bir örnektir ve Ukrainağa hızmet etken bütün musulmanlar içün büyük bir armağandır", — dep qoştı o.
Açılışta Ukraina istihbaratınıñ yolbaşçısı Kırılo Budanov da bar edi, o, musulman arbiylerine işğalcilerge qarşı küreşte köstergen cesürligi içün teşekkür bildirdi ve Bİİ arbiy kefalet hızmeti tarafından tertip etilgen islâm dinini kütken askerler içün Allağa dualar ve zikrler cıyıntığını berdi.
Bundan da ğayrı, tedbirde Bİİ musulman askerleri, brigada generalı Dmıtro Usov, Mudafaa nazirliginiñ adı bildirilmegen vekili ve kapelan Kostântın Holodov iştirak ettiler
Telegram, WhatsApp ve Facebookta Suspilne Qırım haberlerine abune oluñız
