İşğal etilgen Qırımda Lğovske — Ğruşivka — Sudaq yolunıñ qurucılığı vaqtında 7,7307 gektar orman yoq etilecek. Yol qurulışı endi başlandı, işlerni 2027 senesi bitirmege planlaştıralar.
Bunı öz menbalarına atfı etip, "Qırım.Aqiqat" leyhası bunı bildirdi.
Adını bildirmemege istegen yerli mütehassısnıñ aytqanına köre, "Orman hocalığı federal agentligi", "Lğovske — Ğruşivka — Sudaq avtomobil yolunıñ qurucılığı ve rekonstruktsiyası" obyektiniñ planlaştıruv vesiqalarını qabul etti.
"Qırım ekologiya ve tabiat resursları nazirligi bildirdi ki, avtomobil yolunıñ qurucılığı içün ayırılğan Ğruşivka bölük ormanlığı, Eski Qırım ormanlığı ve Sudaq ormanlığınıñ Komsomol bölük ormanlığınıñ ormanlarınıñ umumiy meydanlığı 7,7307 gektarnı teşkil ete", — dep "Qırım. Aqiqat" bildirdi.
Bundan da ğayrı, leyha menbası dedi ki, qurucılar Ğruşivka suv anbarından suv qullanğanları içün anda suv seviyesi tüşti.
Yañı yol, "Tavrida" qarayolundan yalığa qadar olğan üç yoldan biridir. Leyhanıñ fiyatı — tahminen 24 milliard ruble.
Telegram, WhatsApp ve Facebookta Suspilne Qırım haberlerine abune oluñız
