Rusiye işğalcileri Qırımnıñ yerli sakinlerini qanunsız sürette taqip etmege ve apiske almağa devam ete. Rusiye Federatsiyasınıñ müstemlekelerinde tutulğan siyasiy mabüsler arasında saqatlar bar. Em de kerekli tibbiy yardım olmağanı ve tutuv şaraiti yaramay olğanı içün olarnıñ alı fenalaşa ve atta ölümine ketire.
Qırımtatar Maaliy Merkezi (QMM) bunı bildirdi.
Qayd etildi ki, insanlar taqiqat izolâtorları ve apishanelerde yaramay şaraitte tutulğanı, sağlıq şikâyetleri sistematik olaraq körmemezlikke urulğanı, yaramay ve vaqtında berilmegen tibbiy yardım sebebinden olarnıñ sağlıq vaziyeti fenalaşıp tura.
"Yazıq ki, sağlıq meseleleri olıp vefat etken 60 yaşındaki siyasiy mabüs Cemil Ğafarov, 61 yaşındaki Kostântın Şırinğ ve 60 yaşındaki Rustem Virati kibi acınıqlı aqibetlerimiz bar", — dep QMM qayd etti.
Şimdilik, QMMniñ malümatına köre, FSB apishanelerinde tutulğanlar arasında:
Zekirya Muratov — 3 gruppa saqatı.
Oleksandr Sizikov — 1 gruppa saqatlığı.
Timur İbragimov — 3 gruppa saqatı.
Servet Gaziyev — 2 gruppa saqatlığı.
Amet Süleymanov — 3 gruppa saqatı.
Timur Yalkabov — 3 gruppa saqatlığı.
Rustem Seytmetmetov — 3 gruppa saqatlığı.
Mıkola Petrovskıy — 3 gruppa saqatlığı.
2-nci gruppa saqatı olğan Remzi Kurtnezirov şimdi ev apsinde buluna.
"İşğal etilgen Qırımda beden ve maneviy sağlıqnıñ eñ yüksek seviyesine irişüv aqqınıñ bozuluvı artıp tura. QMMniñ malümatına köre, 2024 senesi eñ az 64 fizikiy ve ruhiy sağlıqnıñ eñ yüksek seviyesine aqqınıñ bozuluvı qayd etildi, 56-sı — qırımtatarlarğa nisbeten. 2023 senesiniñ aynı müddetinde 52 adise (43), 2022 senesi ise — 36 (32) adise qayd etildi", — dep QMM bildirdi.
Telegram, WhatsApp ve Facebookta Suspilne Qırım haberlerine abune oluñız
