İşğalciler tarafından qanunsız sürette 13 yılğa apis cezasına maküm etilgen jurnalist, yazıcı ve cemaat erbabı Serğiy Tsığipa Râzan vilâyetiniñ Skopin şeerindeki müstemlekeden Moskvağa avuştırğanlar. O, 2025 senesi saban ayınıñ 27-ne belgilengen kassatsiya makemeniñ oturışını beklep, Medvedkovo rayonınıñ 4-nci SİZOsında buluna. Kassatsiya şikâyeti berilgen soñ bir yıl keçti.
Onıñ apayı Olena Tsığipa Suspilne Qırımğa bergen izaatında bunı bildirdi.
"Bu afta, kerçekten de, etapta edi. O, Râzan vilâyetiniñ Skopin şeerinden keldi. Şimdi Moskvada, Medvedko rayonınıñ dörtünci SİZOsında buluna. Kassatsiya makemesiniñ oturışı saban ayınıñ 27-nde saat 10:00-da olacaq. O vaqıtqa qadar o, anda bulunacaq", — dedi o.
Onıñ aytqanına köre, makeme oturışından soñ da, makemeniñ kâğıt qararını beklegende Moskvada qala bile. Serğiyniñ sağlığı aqqında aytqanda, onıñ apayı, şikâyet etmey, dep qayd etti, amma o, bütün bu adiselerge baqmadan, onıñ sağlığı şimdi ekinci sırada olğanını tüşüne.
"Sağlığı aqqında bir şey yazmadı, şikâyet etmedi. Men bellesem, onıñ başına kelgenlernen qıyaslağanda, bu onı pek raatsızlamay", — dep siyasiy mabüsniñ apayı qoştı.
Olena Tsığipa Rusiye makeme sistemasınıñ adaletliligine inanmay ve kassatsiyadan soñ müsbet deñişmelerni beklemey.
"Ve ceza qısqartılmasını, ya da başqa bir şeyni beklemeyim. Yüce Rabbimiz, daa bir şey olmasın. Onıñ içün o da, biz de bunı yahşı añlaymız. Amma bunı yapmayıp olamayım, çünki Rusiye, qorantası Serğiy içün küreşkenini ve elinden kelgenini yapqanını bilmeli", — dep ayta o.
Onıñ hatırlatqanına köre, kassatsiya şikâyeti 2024 senesi kiçik qış ayında berilgen edi, amma makeme oturışı tek şimdi, bir yıldan soñ, tayin etildi.
"Bu, apellâtsiya makemesinden soñ oldı, yani kiçik aynıñ 24-nde. Ve tek şimdi razı oldılar. Bir yıl keçti", — dep Olena qayd etti.
Serğiy ile bağ şimdilik tek mektüp vastasınen ola bile.
"Şimdi bizler "Zona Telekom" vastasınen yazışamız. O, mektübinde, şimdilik advokatqa telefon etmege imkânı olmağanını yazdı. İmkânı olğanda, oña telefon etecek. Bütün mektüp ve mesajlarnı advokatım vastasınen alam", — dep siyasiy mabüsniñ apayı tarif etti.
Serğiy Tsığipa aqqında ne bilemiz
Yañı Kahovka jurnalisti ve yazıcısı Serğiy Tsığipanı işğalciler endi eki yıldır esir tutalar. O, Ukraina tarafdarı olğanı ve jurnalist faaliyeti sebebinden hırsızlandı, dep imayecisi tüşüne. Ukrain göñüllisi de edi.
2022 senesi saban ayınıñ 12-nde tutulğan soñ, onen bağ kesildi. Daa soñra Rusiye teleyayınında yayınlanğan teşviqat levhasından qorantası onıñ esirlikte olğanını örgendi. Advokatnıñ aytqanına köre, onı Aqmescitteki 2-nci SİZOda tutalar.
Halqara gumanitar uquq işğal etilgen topraqlardan insanlarnı başqa bölgelerge acele ihtiyac olmasa, keçirmege, mecburen ğayıp etüv ve qapalı makeme esnaslarını yasaq ete ve arbiy cinayet olğanını köstere.
Telegram, WhatsApp ve Facebookta Suspilne Qırım haberlerine abune oluñız
