Ukraina uquq qoçalayıcıları işğal etilgen Qırımda Rusiye ordusınıñ erkânında Mudafaa quvetleriniñ mevzilerine ücüm etken İslâm Terek (evelki Kirovske) köyüniñ 29 yaşındaki sakinine qarşı qabaatlav aktını yolladı. Şimdilik adam apiste buluna.
Saban ayınıñ 12-nde Qırım Muhtar Cumhuriyeti ve Sevastopol (Aqyar) şeeriniñ prokurorlığı bu aqqında haber berdi.
Oña Ukraina Ceza qanunnamesiniñ eki maddesine istinaden ömür boyu apis cezası üküm etile bile:
- 111 maddesiniñ 2 qısmı (arbiy vaziyet şaraitinde yapılğan devlet hainligi);
- 111-1 maddesiniñ 7-nci qısmı (Ukraina vatandaşınıñ vaqtınca işğal etilgen topraqta qurulğan qanunsız silâlı ya da arbiyleştirilgen teşkilâtlarda ve/ya da istilâcı devletniñ silâlı teşkilâtlarında göñülli iştirak etmesi).
Taqiqatnıñ malümatına köre, 2023 senesi orta küz ayında Ukraina vatandaşı, Rusiye Federatsiyasınıñ silâlı istilâsına yardım etmek içün, Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) arbiy komissariatına muracaat etip, Rusiye Federatsiyasınıñ Mudafaa nazirliginen Rusiye ordusında hızmet etüv aqqında añlaşma imzaladı.
Ukraina havfsızlıq hızmetinde qayd etkenlerine köre, qısqa vaqıt devamında poligonda azırlıq körgen soñ, o, Rusiye Silâlı quvetleriniñ 136 ayrı motoatıcı brigadasınıñ saper-razvedigi vazifesine tayinlendi ve Zaporijjâ yönelişine yollanıldı. Anda ağır yaralanğan edi.
"Reabilitatsiyadan soñ cinayetçi Harkiv vilâyetine yollanıldı, anda o, duşman ordusınıñ erkânında arbiy areketlerni devam etti", — dep prokurorlıq qoştı.
2024 senesi boş ayda onı Harkiv vilâyetinde USQ askerleri tuttılar.
Ukraina havfsızlıq hızmetiniñ malümatına köre, qabaatlanğan Qırım litsey-internatında arbiy-fizikiy azırlıqnen oquy edi ve Ukraina halqına sadıqlıq antını berdi.
Telegram, WhatsApp ve Facebookta Suspilne Qırım haberlerine abune oluñız
