Ukraina makemesi Qırımdan üç sabıq makemecini devlet hainligi — Ukraina Ceza qanunnamesiniñ 111-inci maddesiniñ 1-inci qısmına binaen 12 ve 13 yılğa apiske aldı. Olar ukrain halqına olğan sadıqlıq antını bozıp, işğalcilerge qol tuttılar.
Saban ayınıñ 10-nda Qırım Muhtar Cumhuriyeti ve Sevastopol (Aqyar) şeeriniñ prokurorlığı bu aqqında haber etti.
Yarımada işğal etilgen soñ maküm etilgenlerden biri "Qırımnıñ Simferopoldaki (Aqmescitteki — terciman) Demiryol rayon makemesiniñ makemecisi" vazifesini", başqaları — Qırımnıñ işğal etilgen Kirov ve Aqmescit rayon makemelerindeki "makemeciler" vazifesini aldılar.
"İstilâcı devletiniñ adından ve menfaatlarında "adalet" yerine ketirerek, mhküm etilgenler yarımadada işğalli makeme akimiyetiniñ çalışmasını temin etti ve çetel devletiniñ vekillerine Ukrainağa qarşı bozuv faaliyetini alıp barmaqta yardım etti", — dep prokurorlıq qayd etti.
Qırım MC ve Aqyar şeeriniñ prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp ve Facebookta Suspilne Qırım haberlerine abune oluñız
