İşğal etilgen Qırımda 78 yaşında qırımtatar milliy areketiniñ faali, ocası Gülizar Abdullayeva vefat etken. Çoq yıllar devamında o, ingiliz tiliniñ alıp berüvine özüni bağışlap Bağçasaray qırımtatar mektebinde ve istidatlı balalar içün internat mektebinde çalışqan edi.
Bunıñ aqqında qırımtatar halqnıñ Meclisiniñ matbuat hızmetinde bildirdiler.
"Büyük kederi ile 2025 senesi saban aynıñ 9 işğal etilgen Qırımda tuvğan medeniyet ve tiline sevgisinde bir qaç nesilini terbiye etken qırımtatar milliy areketiniñ faali, ocası Gülizar Abdullayeva 78 yaşında can bergen", – denile Meclisiniñ beyanatında.
Daa cenaze, saban aynıñ 10 saat 14:00-de Bagçasaraydaki Han-Çayir mikrorayonınıñ camisinde ötkerilecegi aqqında bildirdiler.
Gülizar Abdullayeva aqqında belli olğanı
Gülizar oca, 1947 senesi ilk yaz aynıñ 12 ana-babasınıñ sürgün ettirilgen yerinde – Andijan vilâyetteki (Özbekistan) Aim qasabasında doğğan. O, yedi baladan ibaret olğan Abdulcemil ve Mahfure Mustafayevleriniñ ailesinde altıncı balası edi. Bu balalar soñra qırımtatar milliy areketiniñ faal iştirakçileri olğanlar.
Gülizar oca, ingiliz tili ocası zenaatını alıp Samarqand devlet universitetini bitirgen. 1976 senesi ailenen beraber Qırımğa qaytqan, anda ise – Qarasuvbazar rayondaki Zuya qasabasında yerleştirilgen. Amma 1979 senesi Cemilevlerniñ – Gülizarnıñ özü, onıñ qız qardaşı Dilâra ve olarnıñ babası Abdulcemil ağasınıñ üç ailesi tekrar Qırımdan Krasnodar vilâyetine sürgün etilgenler. Tek 1989 senesi olar vatanğa qaytıp olğanlar.
Çoq yıllar içinde Gülizar Abdullayeva, özüni ingiliz tiliniñ alıp berüvine bağışlay edi, Bağçasaraydaki qırımtatar mektebinde ve Tankovoyedeki istidatlı balalar içün internat mektebinde çalışqan edi. Onıñ toqtatılmaz emegi, ikmeti ve öz işine samimiy sadıqlığı talebeler, işdeşler ve onı şahsen bilip olğan er kesniñ hatırasında qala.
Telegram, WhatsApp ve Facebookta Suspilne Qırım haberlerine abune oluñız
