Qırımnıñ işğalli yolbaşçısı Sergey Aksönovğa qarşı ücüm aqqında sahte dava bölündi. Qabaatlanğanlarnıñ er biri — Volodımır Ananyev, Oksana Şevçenko ve Volodımır Bondar içün makeme oturışları ayrı keçirilecek.
"Tribunal. Qırım epizodı" bu aqqında haber etti.
Resursnıñ malümatına köre, Ananyevniñ davası saban ayınıñ 3-nde baqıldı, bu ekinci oturış edi. Oksana Şevçenko davasınıñ ekinci oturışı bir qaç künden keçirilecek. Volodımır Bondarğa qarşı makeme saban ayınıñ 31-nde başlanacaq.
"Qabaatlayıcınıñ versiyasına köre, 2022 senesi kiçik ayda Qırım toprağında terakt yapmaq içün gruppa teşkil etildi. Onıñ terkibine Volodımır Bodnar ve Oksana Şevçenko kirgen edi. Ücüm azırlanması ve yapılması içün olarğa Qırım yolbaşçısınıñ areket marşrutlarını nezaret etmek vazifesi berildi. Daa soñra gruppağa Volodımır Ananyev kirdi, o, bomba yapmaq içün malzemelerni saqlay edi", — dep aytıla haberde.
Sahte dava mabüsleri 2024 senesi kiçik ayda tutuldı. O vaqıt FSB, işğal etilgen Qırımda UHHUkraina havfsızlıq hızmetiniñ emrinen maşna patlavını azırlağan üç kişiden ibaret olğan gruppanı taptı, dep bildirdi.
Bu seneniñ qara qış-kiçik aylarında Rostov-na-Donudaki makemege davalar berildi.
"Tribunal. Qırım epizodı" resursınıñ analitikacılarınıñ qayd etkenlerine köre, davanıñ istilâcı devletniñ toprağında baqılması, Dörtünci Jeneva şartnamesiniñ talaplarını boza ve adetiy makeme aqqına keder ete bile.
Telegram, WhatsApp ve Facebookta Suspilne Qırım haberlerine abune oluñız
