Ukraina baş naziri Denıs Şmığal ve mudafaa naziri Rustem Umerov, musulman cemiyetini aziz Ramazan ayınıñ başlanuvınen hayırlap muracaat ettiler.
Bunıñ aqqında olar öz Facebook saifelerinde yazdılar.
Rustem Umerov, musulmanlar mustaqil devletinde öz dinine serbest tarzda riayet etmege fırsatınıñ qıymetini bilip ukrainlerniñ episinen Vatannı mudafaa etkenleri aqqında qayd etti.
"Bu yıl Ramazan ayındaki musulman orazası, pravoslav Büyük orazasınen aman-aman bir vaqıtqa kele. O, dinge baqmadan namus, itibar, adalet, teñ uquqlıq, bir-birine ürmet ve ruh quveti kibi umumiy qıymetlerini bölgenimiz aqqında timsaliy hatırlatuvıdır", – qayd etti Ukraina mudafaa naziri.
Baş nazir Denıs Şmığal da bu qıyın devirinde birdemliginiñ müimligini qayd etip mustaqil oğrunda musulmanlarnıñ müim rolüni da belgiledi.
"Musulmanlar içün ayrıca has olğan künleri dua, birdemlik ve destek vaqtı olalar. Duşman, gece-kündüz tınç şeerlerni ücüm etkende, o ise pek müim. Ukrainada musulmanlarnıñ çoqusı, devletni silâ ile imaye etip cebe arqasında küreşimizge qol tutqanlarını bilem. O, serbest, mustaqil Ukrainada yaşayışı – umumiy maqsadımız oğrunda birdemlik ve fedakârlıq misali ola", – yazdı Şmığal.
Hatırlatayıq ki, Ukrainada uvut aynıñ 28 küneşniñ batmasından soñ musulmanlar aziz Ramazan ayınıñ qayd etüvini başladılar. Oraza, saban aynıñ 1-den 29-na qadar sürecek. Saban aynıñ 30 Oraza bayramınıñ (Іd al-Fіtr) qayd etilmesinen bitecek. Suspilne Qırım, böyle vaqiağa dair mumuslmanlarnıñ adetleri aqqında belli olğanının tarif etken.
Telegram, WhatsApp ve Facebookta Suspilne Qırım haberlerine abune oluñız
