Ukrainada musulmanlar kiçik aynıñ 28-nde küneş batqan soñ muqaddes Ramadan ayını qayd etmege başlaylar. Oraza saban ayınıñ 1-den 29-na qadar devam etecek. O, saban ayınıñ 30-nda, İd al-Fitr bayramınen yekünlenecek.
Suspilne Qırım bayram aqqında bilgenlerini añlata.
Bu ay Muhammed Peyğamber Quran-ı Kerimni qabul etkenine inanıla. Musulmanlar ay taqvimini qullanalar, onıñ içün olarnıñ künleri taqvimden farqlı ve yıl 11 künge qısqadır.
Cemaat dua qıla, qoranta ve yaqınlarınen vaqıt keçire. Oraza tutıp, tañdan küneş batqanına qadar aş ve suv içmeyler.
"Ramadan — Quran ayıdır, elâllıq ayıdır, sabır ayıdır, ümüt ayıdır, oraza ayıdır. Yani, bütün dünyanıñ musulmanları, Ramadan ayı yaqınlaşqanda ve mubarek Ramadan ayı kelgende — biz oraza tutamız", — dep keçken sene Suspilne Qırımğa Ukraina musulmanları diniy idaresiniñ baş müftisi Murat Süleymanov tarif etti.
Müfti, Ramadan da Ramazan dep adlandırılğanını añlattı. Bu eki sözniñ farqı tek telâffuzda.
Onıñ aytqanına köre, aqşam iftarı (qonuşuv, yemek) camilerde hayriye aşlarınen keçirile.
"Biz bunı qorantamıznen yapa bilemiz, er kes ayrı yapa bile, amma Ramadan ayında bu camide yapıla. Yani, musulmanlar toplaşalar, Ramadan ayında sadaqa bermege ya da eyilik yapmağa isteyler. O özü aş pişire ya da para bere ve birisi onıñ yerine aş pişire, bundan soñ ise insanlarnı davet ete", — dep müfti qayd etti.
15 yaşından başlap, sağlıq imkânı olğan büyükler oraza tutalar, balalar ise öz isteklerine köre oraza tuta bileler. Bu arada cenk alanında bulunğan arbiy musulmanlar orazanı başqa vaqıtqa qaldıra bileler.
"Lâkin bu olar içün borc olacaq. Yani, imkânları olğan diger künlerde olar orazanı tutacaqlar", — dep müfti añlattı.
Süleymanov, 2025 senesi saban ayınıñ 30-nda olacaq Oraza Bayramı, saba namazınen, qorantanıñ hayırlavınen başlana, dep tarif etti. Cenkten evel, balalarnıñ bayramnı eñ yahşı şekilde keçirmeleri içün balalar içün oyunlar teşkil etile, tatlılar pişirile edi. Şimdi diqqat maneviylikke ve yaqınlarına destek berüvge celp etile.
Telegram, WhatsApp ve Facebookta Suspilne Qırım haberlerine abune oluñız
