"Almenda" vatandaşlıq maarifi merkeziniñ reisi Mariya Sulâlina işğal etilgen Qırımda ukrain tasiliniñ yoq etilüviniñ miqyasını aydınlattı ve Ukrainanı er bir bala içün küreşni quvetleştirmege çağırdı.
Bunı o, Yarımadanıñ işğaline muqavemet künü kiçik aynıñ 26-nde "11 yıllıq cenk. Başlanğıç noqtası: Qırım" milliy forumında bildirdi.
2014 senesinden başlap Rusiye işğalli akimiyeti yarımadada ukrain tasil sistemasını bütünley yoq etti. Hususan, bütün ukrain dersliklerini alıp taşladı ve mektepte ukrainşınaslıq derslerini (Ukraina tarihı, ukrain tili, grajdanlıq tasil) alıp çıqardı.
Onıñ yerine bütünley arbiyleştirüv kirsetildi: balalarnı 14 yaşından başlap Rusiye ordusına "emek faaliyeti"niñ derslerinde qoşalar, dep qoştı o.
"Almenda"nıñ malümatına köre, umumen Qırımda 500 060 bala qayd etildi, olardan 283 biñi — mektep çağındaki balalar. İşğalden evel bütün balalar ukrain tilini ögrene edi, 2024 senesi ise — tek 0,5%-i — fakultativ olaraq ukrain tilini ögrene.
Bundan ğayrı, Sulâlina bildirdi ki, Rusiyege qoltutqan "Yunarmiya"da 2016 senesi iştirak etken 40 baladan, tek Sevastopolda (Aqyarda), 2024 senesi 17 biñge arttı.
2014 senesinden 2023 senesine qadar Qırım balalarınıñ tek 4%-i ukrain tasil vesiqalarını aldı. Bu 3922 baladır.
Onıñ aytqanına köre, yañı Rusiye qanunları 14 yaşından başlap balalarnı "aşırıcılıq faaliyeti" içün cinaiy taqip etmege imkân bere, bu ise ukrain tasilini daa telükeli yapa.
Sulâlina qayd etti ki, Ukraina bu balalarğa tasil almaq içün "añlayışlı ve telükesiz" irişimni temin etmeli.
"Biz kimge qaytacaqmız? Bizni beklegenler barmı? Şimdi olar bar. İşğal ne qadar devam etecegini bilmeymiz. Bizler Qırımda bizni beklegen insanlar qalsın dep, er şeyni yapmalımız. Amma tasil qısmı aqqında aytsaq, qabul etken taraf, işğal etilmegen Ukraina toprağı aqqında aytmaq pek müimdir", — dedi o.
"Almenda" yolbaşçısı şunı da qoştı ki, Ukraina ocalarnıñ ögretkenleri ve çalışqanları metodik malzemeler 11 yıldır Rusiye işğali ve teşviqatı altında bulunğan Qırım mektep talebelerine uyğun olması aqqında aytmaq kerek.
"Ve bu pek müim adımlar, bizler anda yapa bilecekmiz ve yapmalımız, çünki kerçekten de vaqıt bizge qarşı oynay. 11 yıl devamında daa çoq şeyni tüzetmedik, lâkin olarnı daa evel tüzetmek kerek edi", — dedi o.
Telegram, WhatsApp ve Facebookta Suspilne Qırım haberlerine abune oluñız
