Qırımtatar Milliy Meclisiniñ reisiniñ muavini Nariman Celâl Rusiye esirliginde olğan tecribesi ve işğal etilgen Qırımda devam etken repressiyalar aqqında tarif etti. O, işğal yarımadanı sakinleri içün apishanege çevirgenini ve azatlıq oğrunda küreş apishaneler tışında da devam etkenini qayd etti.
Celâl "11 yıllıq cenk. Başlanğıç noqtası: Qırım" milliy forumında ikâye etti.
Onıñ qayd etkenine köre, şimdi Qırım sakinleri içün apishanege çevirildi. Rusiye işğalci akimiyeti repressiya sistemasını qurdı, anda resmiy teşviqatqa qarşı kelgen er angi qarşılıq ya da fikir sert bir şekilde bastırıla.
"Qırım bugün, teessüf ki, özü de bir apishanege çevirildi, onıñ divarlarını bir çoq insan körmegenler doğrudan-doğru işğal altında bulunalar", - dep qayd etti o.
Aqmescit SİZOsında bulunğanda Celâl siyasiy mabüs Kostântın Şırinğnen tanış oldı, o, oña Viktor Franklnıñ kitabını berdi.
"Şırinğ, divarnıñ tışında kim oturğanını bilip, pek quvandı ve maña Viktor Franklnıñ kitabını berdi. Men onı oqudım ve Qırım apishane olğanı aqqında bir maqale yazdım", - paylaştı Celâl.
Onıñ aytqanına köre, kitap oña etrafında olğan şeylerni añlamağa yardım etti, ve eñ esası — küreşniñ manasını ğayıp etmemek olğanını añladı. O şunı da ayttı ki, apishaneniñ ilk künleri eñ qıyın edi, çünki basqı em fizikiy, em de ruhiy edi.
"İlk künleri ne olğanını añlamağa tırıştım. Amma eñ esası — men ne içün küreşkenimni bilem, ve bu meni küçlendirdi", — dep qayd etti o.
O, apishaneniñ memuriyeti mabüslerniñ maneviy bozuluvı içün çeşit usullarnı qullanğanını tarif etti: er kün yüz bergen aqaretlev ve aşağılavdan başlap, doğrudan-doğru qorquzuv ve fizikiy basqığa qadar. Lâkin siyasiy mabüsler biri-birine qol tuttılar ve özlerini bozulmağa bermediler.
"Qırımnıñ işğali cinayettir, ve apishanede bile küreşimizni devam ettirdik", — dedi o, diger siyasiy mabüslerni hatırlap, olarnıñ arasında Oleksiy Kıselöv, Boğdan Ziza, İrına Danılovıç ve Osman Arifmemetov".
Bütün qıyınlıqlarğa baqmadan, o Ukrainanıñ ğalebesine işançını bildirdi.
"Rusiyeniñ ğalebe qazanacağına iç bir saniye inanmayım. Ukrainler öz kimliklerini saqlap qalacaq ve işğalniñ aqibetlerini yeñecekler", — dedi Celâl.
Telegram, WhatsApp ve Facebookta Suspilne Qırım haberlerine abune oluñız
