Qırımnı işğalden azat etüv meselesi halqara kün tertibinden çıqarılamaz. Ukraina toprağınıñ berilmesini közde tutqan er angi añlaşma red etilmeli.
Bunı Qırımtatar Milliy Meclisiniñ reisi Refat Çubarov "11 yıllıq cenk. Başlanğıç noqtası: Qırım" milliy formunıda bildirdi.
Onıñ qayd etkenine köre, Ukraina ve dünya Qırımnı azat etüv meselesini diqqat merkezinde tutmağa devam etmeli.
"Rusiye işğal etilgen yarımadanı ğayıp olğanı kibi köstermege tırışsa da, Qırımnı azat etüv ve deokupatsiya meselesi halqara kün tertibinde qalmaq kerek", — dep Çubarov qayd etti.
O, cenkni toqtatmaq içün topraqlarnıñ ğayıp olmasına razı olmağa ıntıluvlar qabul etilmeycegini qayd etti:
"Er angi teklifler, olar kimden çıqqan olsa da, Ukrainanıñ öz toprağınıñ bir qısmını teslim etmesini közde tutsa, ukrain cemiyeti ve Ukraina akimiyeti tarafından red etilmek kerek", — dep qayd etti o.
Çubarov şunı da qayd etti ki, Qırımnıñ taqdiri yalıñız ukrain halqı ve qırımtatar cemiyetiniñ iştiraginen al etilmeli.
"Qırımnıñ kelecek taqdirini çezmek ıntıluvları tek tamır qırımtatar halqı ve Ukraina devletiniñ iştiragi ve razılığınen mümkün", — dep Meclisniñ reisi bildirdi.
Çubarov, işğalden soñ Qırımda devam etken repressiyalarğa da diqqat çekti.
"Rusiyeniñ 11 yıllıq işğali vaqtında Qırım arbiy meydanğa çevirildi, anda kritik vatandaş obyektlerine raketa ve arbiy uçaqlarnıñ ücümleri yapıla", — dedi o.
O, işğal etilgen yarımadada qırımtatarlar ve ukrainlerniñ taqip etilüvini hatırlattı:
"Rusiye işğalci akimiyeti tamır qırımtatar halqınıñ kollektiv aqlarını ve insan aqlarını muntazam ve tsinik şekilde boza, Qırım sakinlerine qarşı repressiyalar ve cinayet areketlerini kerçekleştire", — dep Çubarov qayd etti.
Читати ще
Telegram, WhatsApp ve Facebookta Suspilne Qırım haberlerine abune oluñız
