Kiçik aynıñ 20-nde Qırımnıñ işğalli Yuqarı makemesi Keriç rayonınıñ (eski Lenin rayonı) Semısotka (Suv Ağar) köyüniñ 32 yaşındaki sakini Ruslan Mambetovnı Rusiye Federatsiyasınıñ Ceza qanunnamesiniñ 275 maddesine binaen "devlet hainligi" içün 18 yıl apis cezasına maküm etti.
Ukrainada yasaq etilgen "VKontakte" Rusiye içtimaiy ağında işğalli makemeniñ matbuat hızmeti bu aqqında haber berdi. Onıñ adını kiçik aynıñ 24-nde Qırım uquq qorçalayıcı gruppası (QUQG) bildirdi.
"Makeme"niñ malümatına köre, adam tutulğanğa qadar aydavcı olıp çalışqan edi.
"Makeme mabüsniñ areketlerini Rusiye Federatsiyasınıñ Ceza qanunnamesiniñ 275 maddesi — devlet hainligi, yani Rusiye Federatsiyası vatandaşı tarafından yapılğan casuslıq — Rusiye Federatsiyasınıñ Silâlı quvetlerine qarşı qullanıla bilgen be Rusiye Federatsiyasınıñ iştiraginen silâ ve arbiy tehnika qullanılğan diger areketler şaraitinde yapılğan malümatnı duşmanğa bermek maqsadınen berüv, toplav", — dep aytıla haberde.
İşğalli makemeci Alla Hınevıç Mambetovğa sert rejimli müstemlekede 18 yıllıq apis cezasını berdi, ondan soñ o, 1 yıl 6 ayğa azatlıqtan marum qaldı ve 100 biñ rublelik (30 biñ ğrıvnâ) para cezasını aldı.
Uquq qorçalayıcılarnıñ malümatına köre, adam 2024 senesi orta küz ayınıñ 3-nde tutulğan edi.
Bundan ğayrı, QUQGnıñ malümatına köre, Qırımdaki "ukrain diversantları ve casusları davaları" boyunca apishanelerde eñ az 83 insan tutula. Olarnıñ arasında yarımadada tutulğanlar ve Rusiye tarafından Zaporijjâ ve Herson vilâyetlerinde hırsızlanğan eñ az 28 insan bar.
Hususan, FSB hadimleri tutuluv vaqtında Qırım sakinlerini "diversiya azırlağanda, silâ saqlağanda ve casuslıq yapqanda" qabaatlay. Uquq qorçalayıcılar, Qırım sakinlerinden itiraf alması içün qanunsız taqiqat usulları ve işkence qullanuvı, qabaatsızlıq prezumptsıyasınıñ bozuluvı, em de Rusiye FSBsiniñ "itiraf" videosınıñ Rusiye kütleviy haber vastaları yardımınen tarqatılmasını qayd eteler.
Aynı zamanda Qırım uquq qorçalayıcı gruppası qoştı ki, 2024 senesi bu davalar boyunca Rusiye ve işğalli makemeler eñ az 23 üküm çıqardı.
Telegram, WhatsApp ve Facebookta Suspilne Qırım haberlerine abune oluñız
