"Serbest Qırımğa mektüpler" teşebbüsi çerçivesinde Sens kitap tükânınıñ tesisçisi Oleksiy Erinçak, bugün qanunsız Rusiye apishanesinde 40 yıllığını qayd etken qırımtatar faalcisi Remzi Bekirovnıñ mektübini oqudı.
Ukraina prezidentiniñ Qırım Muhtar Cumhuriyetindeki temsilciligi bunı bildirdi.
Remzi Bekirov 2019 senesi saban ayınıñ 27-nde tutuldı, 2022 senesi saban ayınıñ 10-nda Rostov-na-Donu makemesi onı sert rejimli müstemlekede 19 yılğa üküm etti, birinci 5 yılını apiste keçirmeli.
"Remzi Bekirov şimdi Qırımdan 5000 km uzaqlıqta bulunğan Hakasya Cumhuriyetiniñ Abakan şeerinde 33-ünci TM müstemlekesinde buluna. O, bir qaç kere qanunsız sürette mahsus ceza izolâtorına tüşürilgen edi, böyle sebepler uydurılğan, saçma, baş kiyiminiñ yoqluğı ya da “doğru olmağan yerde” namaz qılğanı içün, neticede yarım yıl içinde o, 7 kere ŞİZOda bulundı, ilk qış ayında ise, Remzi Bekirovnıñ sert tutuv şaraitine avuştırılğanı belli oldı", — dep aytıla haberde.
Prezidentniñ QMCdeki temsilciligi de Qırım siyasiy mabüslerine mektüp yazmağa çağıra. Bunı kiçik aynıñ 20-27 künleri saat 9:00-dan 20:00-ge qadar "Sens" kitap tükânında yapmaq mümkün.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.
Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.
Facebook, Instagram ve Telegramda haberlerimizni oquñız, bizim YouTubeve TikTokımıznı baqıñız
