Ukrainada Kıyiv vilâyetiniñ Hocalıq makemesi Qırım prokurorlığınıñ South African Airways şirketinden 646 biñ ğrıvnâ miqdarında borcunı talap etüv davasını qanaatlendirdi. Bu miqdarnı şirket Ukraina ava boşluğında, hususan Qara deñiz üzerinde berilgen aeronavigatsiya hızmetleri içün ödemek kerek.
Qırım ve Sevastopol (Aqyar) şeeriniñ prokurorlığınıñ matbuat hızmeti Telegram kanalında bu aqqında haber etti.
Qayd etilgenine köre, Afrika ava şirketiniñ uçaqları Ukraina ava boşluğında, şu cümleden — Qara deñizniñ açıq suvları üzerinde uçuşlar yaptılar. Faqat şirket Ukraina qanunları, Halqara vatandaş aviatsiyası teşkilâtınıñ qaideleri ve Avropakontrol qaidelerine köre belgilengen aeronavigatsiya ücretlerni ödemedi.
"Dava açılmasınıñ sebebi — strategik emiyetke saip devlet obyektiniñ ("Ukruçaqareket" DM) faaliyetiniñ stabilligini temin etüv ve Ukrainanıñ 1944 senesiniñ halqara vatandaş aviatsiyası aqqında şartnamesinde belgilengen vazifelerini eda etüv. Şimdilik makemeler prokurorlıqnıñ 7,7 million ğrıvnâ miqdarında bu kategoriyada davalar boyunca talaplarını qanaatlendirdi. Bunen beraber, 3,7 mln ğrıvnâdan çoq para devlet faydasına çekildi", — dep aytıla haberde.
Facebook, Instagram ve Telegramda haberlerimizni oquñız, bizim YouTubeve TikTokımıznı baqıñız
