Rusiye ordusı tarafından işğal etilgen topraqlardan tahminen 4 biñ ukrain balası tasil almaları ve yañıdan programmalaştırılmaları içün Qırımğa alıp ketirildi. İşğalciler böyleliknen ukrain kimligini yoq etmege tırışalar.
Öz Telegram kanalında Ukraina Yuqarı Şurasınıñ insan aqları vekâletlisi Dmıtro Lubinets bunı yazdı.
Onıñ aytqanına köre, rusiye işğalcileri ukrain kimligini yoq etmek içün balalarnı "ögrenüvge" alıp keteler. Rusiye dersliklerinde ve tasil programmalarında bunıñ içün mefküreviy basqı yapıla.
"Ukraina ombudsmanı olaraq halqara meydançıqlarda daima qayd etem ki, halqara gumanitar uquq Rusiye Federatsiyasına, istilâcı olaraq, ukrain balalarını sürgün etmege ve mecburen köçürmege yasaq ete. Lâkin Rusiye, cenkniñ qaidelerine zıt kele, Qırım işğalinden berli qurulğan açıq bir mehanizmnen areket ete. Ana-babaları ve balalarnıñ başqa qanuniy temsilcileriniñ zayıf vaziyetini qullanıp, işğalciler, çoqusı aldanıp, qorquzıp, olarnı ana-baba aqlarından marum eteler ya da ukrain balalarını bütün ukrainlikten uzaqqa alıp keteler", — dep Dmıtro Lubinets qayd etti.
O şunı da qoştı ki, Rusiyeniñ ukrain balalarınıñ mecburiy köçürüvi ve sürgünligi — bu tek arbiy cinayet degil, aynı zamanda Rusiye Federatsiyasınıñ genotsid siyasetiniñ bir qısmıdır.
"Halqara ortaqlarnı bu cinayetni toqtatmaq ve ukrain balalarını Vatanına qaytarmaq içün Rusiyege basqını sertleştirmege çağıram", — dep Lubinets qayd etti.
Telegram, WhatsApp ve Facebookta Suspilne Qırım haberlerine abune oluñız
