İşğal etilgen Qırımda Rusiye rejimine qarşı faal muqavemet devam ete. İşğalli memuriyet Qırım sakinlerini ukrain ve qırımtatar kimliginiñ er angi ifadeleri içün ve Rusiye istilâsını tenqit etkenleri içün taqip ete.
Ukraina Prezidentiniñ Qırım Muhtar Cumhuriyetindeki Temsilciligi #muqavemet_areketi (#рух_спротиву) rubrikasında bu aqqında haber etti.
İşğalli akimiyetni tenqit etkeni içün taqip etüvniñ yañı adiseleri qayd etildi:
- Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) yerli sakinge, Rusiye ordusınıñ areketleri aqqında menfiy lafları içün, 40 biñ rublelik para cezası berildi.
- 39 yaşındaki Yañı Qapu şeeriniñ sakinini içtimaiy ağlarda Ukraina Silâlı quvetlerine qoltutqanı içün tuttılar, apiste kamerağa afu soramağa zorladılar, davanı qanunsız "makeme"ge berdiler.
- Keriçte 50 yaşındaki adamnı işğalli akimiyetni tenqit etkeni içün cezaladılar. O, videoda afu soramağa mecbur etildi ve oña qarşı protokol tizildi.
- Sevastopol (Aqyar) sakini Rusiyeniñ Ukraina arbiy istihbaratı aqqında malümat bergeninde qabaatlanıp, müstemlekede 5 yılğa üküm etildi.
- İspaniyadan mülküni satmaq içün qaytqan Sevastopol (Aqyar) sakini işğalciler tarafından "devlet hainligi"nde qabaatlanıp, 12 yılğa apiske alındı.
"Ateş" faalcileri Keriç köpründen arbiy obyektlerni ve yaqarlıq taşımalarını qayd eteler, em de yarımadadan Rusiye zenit-raketa bölükleriniñ çıqarılması aqqında bildireler. "Sarı şerit" iştirakçileri Qırımnıñ esas şeerlerinde teşviqat malzemelerini yoq etip, vatanperver timsallerini tarqatalar. "Açuvlı Mavka" işğalcilerniñ cinayetlerini vesiqalaştıra ve şeerlerni ukrain timsallerinen yaraştıra.
Kiçik aynıñ 13-nde Rusiye işğalli memuriyeti 221 insannı qanunsız alda tuta, olarnıñ arasında 134 qırımtatar bar. Olar "qşırıcılıq" ve "devlet hainligi" kibi uydurılğan cinayetlerde qabaatlanalar. 2025 senesi qara qış ayında Qırımda "Rusiye Federatsiyasınıñ silâlı quvetlerini itibardan tüşürgeni" sebebinden 1203 memuriy dava açıldı. Cezalarnıñ umumiy miqdarı 34,15 mln ruble oldı.
Telegram, WhatsApp ve Facebookta Suspilne Qırım haberlerine abune oluñız
